VOV4.Bahnar - ‘Năr 5/9, kŭm hăm tĕh đak, hŏk tro dôm dêh char Tây Nguyên đei 1 tơ drong lêh mât hŏk sơ năm hŏk ‘nao 2021-2022 gĭt kăl ƀât mă tơ drong jĭ covid-19 oei tơ pŏh tôch hơ mơt. Jĭ 1 dêh char tơ̆ Tây Nguyên tam mă đei bơ ngai jĭ covid-19 lơ̆m tơ pôl, mă lei vă kơ chăng tang găn jĭ, Lêh mât hŏk sơ năm hŏk ‘nao 2021-2022 đei anih vei lăng pơ tho pơ hrăm dêh char Kon Tum pơ gơ̆r kiơ̆ trong trư̆k tuyê̆n lơ̆m tivi, kiơ̆ trong hơ yuh đơ̆ng Anih Radio pơ dăh um rup dêh char păng 1,2 trong hơ yuh đơ̆ng internet. Sơ năm hŏk ‘nao, dêh char Kon Tum đei hlŏh 164.000 ‘nu hŏk tro đơ̆ng lăm mâm non truh lăm 12. Đơ̆ng rŏng kơ pơm lêh, năr ‘nâu, 6/9, hŏk tro lơ̆m dêh char pơ tơm mât hŏk lơ̆m năr hŏk mă blŭng tơ̆ hnam kiơ̆ trong trư̆k tuyê̆n. Dêh char pơ jao ăn dôm hnam trưng kơ chăng pơ gơ̆r klăih song khul hŏk tro vă rơih trong pơ tho đei yoa ‘lơ̆ng hlŏh.

Kon Tum năr pơm lêh mât hŏk sơ năm hŏk ‘nao ưh đei hŏk tro

 Kŭm pơ gơ̆r lêh mơ̆t hŏk blŭng sơ năm hŏk ‘nao 1 trong ‘lơ̆ng hơ iă, kơ đeh pơm kiơ̆ hơ yuh ti vi pơ̆ih kơ tă, hloh 392 rơ bâu ‘nu hŏk tro tơ̆ 714 hnam trưng hŏk tơ̆ dêh char Gia Lai hlôi hơ met tôm yak mơ̆t lơ̆m sơ năm hŏk ‘nao. Vă lăp hăm tơ drong jĭ hơ buh, đơ̆ng ‘năr 6/9, anih vei lăng pơ tho pơ hrăm Gia Lai pơ gơ̆r pơ tho păng hŏk kiơ̆ 2 trong, Kiơ̆ kơ ‘noh hŏk tro tơ̆ 2 tơ ring tŏk bŏk pơm kiơ̆ tơ drong tơ chơ̆t 16 đơ̆ng Thủ tướng teh đak ‘noh pơ lei tơm Pleiku păng Thị trấn Phú Túc (apŭng Krông Pa) gô hŏk trực tuyến. Hŏk tro tơ̆ dôm tơ ring uơ oei dơ̆ng gô hŏk akŏm. Rim hnam trưng hŏk tơ̆ Gia Lai kŭm hlôi hơ met ăn hơ nih, tơ mam, pơm hơ tŏk ming kơ măy kơ mŏk kơ tơ̆ng ang, hơ met ăn tôm pơm kiơ̆ pơ tho hŏk trực tuyến mưh kăl.

Gia Lai pơ gơ̆r mơ̆t hŏk blŭng sơ năm hŏk ‘nao đei pơ dăh tơ vi kơ tă đơ̆ng hnam trưng hŏk jăl 3 chuyên Hùng Vương ( pơ lei tơm Pleiku)

Tơ̆ Dak Lak, rim hnam trưng hŏk kŭm pơ gơ̆r lêh mơ̆t hŏk blŭng sơ năm hŏk 2021 – 2022 lơ̆m pơ gê ‘năr 5-9 kiơ̆ trong trực tuyến, vei sơ đơ̆ng, tơ tĕnh, ‘lơ̆ng, tơ ƀôh jơ hngơ̆m đon vang tơ gŭm, pơ lung hŏk tro, thây kô pơ tho yak hloh mơ mat tat vă jang đang hơ năp jang pơ tho păng hŏk. Sơ năm hŏk âu, lơ̆m dêh char Dak Lak đei hloh 450.000 ‘nu hŏk tro rim jăl. Tơ̆ hơ năp tơ drong jĭ hơ buh, dêh char hlôi kơ dŭn ‘mơ̆i jơ năr pơ tơm sơ năm hŏk ‘nao truh ‘năr 15-9, vă anih jang vei lăng găh pơ tho pơ hrăm păng kon pơ lei đei jơ năr hơ met ăn mă ‘lơ̆ng rim tơ drong hiôk tơ lĕch jang pơ tho păng hŏk.

Hok tro Dak Lak pơ gơ̆r mơ̆t hŏk blŭng sơ năm hŏk ‘nao trực tuyến kiơ̆ internet

Hăm tơ drong hơ met ăn ‘lơ̆ng, Dak Nông ‘noh jĭ dêh char 1 drô̆ đĕch tơ̆ dêh char Tây Nguyên pơ gơ̆r lêh mơ̆t hŏk blŭng sơ năm hŏk ‘nao tơ̆ rim hơ nih pơ tho pơ hrăm, mă lei pơm kiơ̆ oei hơ tăih băl 50 -50. Hơ drô̆ dêh char Lâm Đồng gô ăn hŏk tro năm hŏk lơ̆m ‘năr 15/9 păng pơ gơ̆r mơ̆t hŏk blŭng sơ năm hŏk ‘nao lơ̆m ‘năr 18/9.

Dơ̆ng hăm Thuem: Tơ blơ̆