VOV4.Bahnar - Hăm jơ hngơ̆m đon kŭp yom, pơ gê (26/5) tơ̆ Hnam chua Quán sứ, Hà Nội, Khŭl lui Phật Việt Nam pơ gơ̆r pơ dăh ti vi trực tuyến Lêh tih Phật đản Phật lịch 2565- Dương lịch 2021. Thủ tướng Phạm Minh Chính gơ̆ih pơ kao hmach chơt hơ iă. Tơ drong soi kơ kuh đei rim đe Chư tôn đức Tăng ni Jơ nŭm vei lăng pơ gơ̆r hơ drô̆ păng pơ dăh kơ tă truh hơ nih soi ăn kơ rim bơ ngai lui phật đei măt tơ̆ hnam chua păng pơ̆ih pơ re kơ tă lơ̆m kênh mạng tơ pôl kơ khŭl lui phật Việt Nam păng lơ̆m kênh ti vi An Viên truh khŭl lui phật lơ̆m teh đak.

Yua đơ̆ng jĭ hơ buh krê hơ mơt kơ na đĭ đăng khŭl lui phật năm pơm lêh adoi pơm kiơ̆ tơ păt tơ drong hơ găt 5K păng pơm kiơ̆ lêh soi hăm jơ hngơ̆m kŭp yom. Thượng tọa Thích Đức Thiện, Tổng Thư ký, Phŏ kơ dră Jơ nŭm vei lăng Trung ương Khŭl lui phật Việt Nam tơ băt ‘nâu jĭ tơ drong jang kăl tôch kơ ‘lơ̆ng, tơ gŭm bơ ngai lui phật tơ ƀôh jơ hngơ̆m kŭp yom hăm yang Phật ‘moi kiơ̆ tơ drong jang tơ hum Phật hai, tơ ƀôh jơ hngơ̆m ‘mêm mơ nat, tơ goăt tơ goăl, vang tơ gŭm hăm Khŭl lui phật Việt Nam, yak hơ dai hăm hơ drĕch hơ drŭng lơ̆m tơ drong tang găn jĭ hơ buh hai.

Thuem: Tơ blơ̆