VOV4.Bahnar - ‘Năr 12/11, Anih tơm vei lăng găh bơ ngai jang - linh jĭ rơ ka păng tơ pôl pơ gơ̆r, jang hơ dai hăm rim anih jang Liên hợp quốc tơ̆ Việt Nam pơ gơ̆r Lêh tơ lĕch jang khei bơ̆ jang yua kơ hơ tŏ hơ nơ̆ng drŏ nglo hăm drŏ kăn păng tang găn, tơ jră hăm teh dong băl kiơ̆ lơ̆m drŏ nglo hăm drŏ kăn sơ  năm 2021 đơ̆ng ‘năr 15/11 truh ‘năr 15/12 hăm hơ năn “ vei sơ đơ̆ng tơ drong arih sa tơ pôl, hơ tŏk tơ drong pơm tơm păng pơm tơ drong hiôk ăn drŏ kăn păng hơ ioh drŏ kăn vă jang kiơ̆ hơ tŏ hơ nơ̆ng drŏ nglo hăm drŏ kăn păng sŭt hŭt tơ drong teh dong hăm drŏ kăn păng hơ ioh drŏ kăn”. Tơ drong tơ lĕch jang Khei bơ̆ jang yua kơ hơ tŏ hơ nơ̆ng drŏ nglo hăm drŏ kăn păng tang găn, tơ jră hăm teh dong băl kiơ̆ lơ̆m drŏ nglo hăm drŏ kăn đơ̆ng sơ năm 2016 truh dang ei hlôi pơm đei dôm hơ iă ‘lơ̆ng, sơng đei tơ drong vang jang kiơ̆, bơ ngơ̆t truh, vang tơ gŭm tơ mơ̆t jang đơ̆ng pơ đĭ pơ tôl, tơ gop pơm tơ jê̆ hơ tăih băl đơ̆ng drŏ nglo hăm drŏ kăn lơ̆m vă đĭ đăng rim tơ drong jang. Kơ sô̆ hơ tŏk tơ iung drŏ nglo hăm drŏ kăn tơ̆ kơ sô̆ kơ jung, hơ nhăk Việt Nam dơ̆ng mă 65 lơ̆m kơ sô̆ 162 teh đak păng oei lơ̆m grŭp lơ hloh lơ̆m 5 grŭp lơ̆m apŭng plĕnh teh. Mă kăl ‘noh, tơ drong tơ lĕch ăn Tơ drong jang tơ roi tơ băt găh hơ tŏ hơ nơ̆ng drŏ nglo hăm drŏ kăn truh sơ năm 2030 tơ ƀôh tơ drong bơ ngơ̆t truh gĭt kăl đơ̆ng khŭl kơ dră teh đak hăm tơ drong jang tơ roi tơ băt găh hơ tŏ hơ nơ̆ng drŏ nglo hăm drŏ kăn. Lêh tơ lĕch jang Khei bơ̆ jang sơ năm 2021 krao hơ vơn đĭ đăng rim pang ƀơm truh păng kon pơ lei jang kiơ̆ păng tơ lĕch jang rim tơ drong jang hơ dăh ‘lơ̆ng vă pơ trŭt tơ drong hơ tŏ hơ nơ̆ng đơ̆ng drŏ nglo hăm drŏ kăn păng tang găn, tơ jră rim trong pơ dê păng teh dong kiơ̆ lơ̆m drŏ nglo hăm drŏ kăn.

Thuem: Tơ blơ̆