VOV4.Bahnar - Ƀlep lơ̆m năr tơbăt 76 sơnăm năr Mi tơdrŭh ƀôm hạt nhân lơ̆m pơlei tơm Hiroshima, Nhật Bản, Tổng thư ký Liên hợp quốc Antonio Guterres hlôi pơma tơbăt jơhngơ̆m đon ‘mêm mơnat hăm rim bơngai lôch răm păng bơngai oei hơrĭh đơ̆ng rŏng tơdruh ƀôm au, adoi tơtăm kơtang găh tơdrong apŭng plĕnh tĕh tim mă iŏk đei hơ iă lơ̆m yak trŭh trong tơlĕch jang tơ iung pơjing mĭnh apŭng plĕnh tĕh ư̆h kơ đei ƀrơ̆m phao hạt nhân. Tổng thư ký Liên hợp quốc akhan, rim tĕh đak hlôi păng tok bŏk hơmet atŏk kơtang hơnĭh mong răk ƀrơ̆m phao kơtoang kơ đe sư lơ̆m dôm sơnăm tơ jê̆ au, pơm ăn đei tơdrong pơting dĭh băl ƀrơ̆m phao kơtoang ‘nao dơ̆ng. Ƀok krao hơvơn đĭ đăng rim tĕh đak đei ƀrơ̆m phao hạt nhân kĭ pơkăp rim tơdrong tơchơ̆t tơ jur hơmơt. Vă sơđơ̆ng ƀlep tơ jră tang găn tơdrong iŏk yua ƀrơ̆m phao hạt nhân ‘nŏh jing tŭk hŭt đĭ đăng. Liên hợp quốc hơnơ̆ng pơkăp kơtang pơjing đei mĭnh apŭng plĕnh tĕh ư̆h kơ đei ƀrơ̆m phao hạt nhân.

Tơblơ̆ nơ̆r: Amazưt