Đei nơ̆r asong đơ̆ng Anih vei lăng pôk rơih tĕh đak, tơ ning, ‘năr 22/5, 7 kơ đông linh vei lăng sơ lam tĕh đak păng Tiểu đoàn pơ tâp pơ hrăm găh Ƀô đô̆i vei lăng tơ ring sơ lam Dak Lak vă pơ gơ̆r hrôih tơ drong pôk rơih Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring đơ̆ng 2021 – 2026. Truh dang ei, rim tơ drong hơ met hlôi đei Ƀô đô̆i vei lămng tơ ring sơ lam Dak Lak jang hơ doi hăm Anih vei lăng pôk rơih dêh char Dak Lak jang kĕh bơih, rim tơ drong đei jang đang vă sơng kơ hrĕng 'nu bơ ngai tăh hla 'nŏh jĭ đe linh năm tăh hla bơ̆ jang tơ drong gơ̆h jang păng hơ năp jang đơ̆ng kon pơ lei.

Đei măt tơ̆ kơ đông linh 737, xăh Ia R’vê, apŭng Ea Súp dôm năr ‘nâu, nhôn ƀôh jơ hngâm đon chơt hơ iă kơ năr pôk rơih. Tơ̆ hơ nih pôk rơih kơ sô̆ 11 (Hnam hôp kơ đông linh 737), tơ drong hơ met pơ ‘lơ̆ng hnam hôp, pruih pơ gang pơ lôch pơ rang jĭ, pơ klĕm hơ năn bơ ngai lĕch pơ jei, hơ năn bơ ngai tăh hla, kơ thŭng mong kơ phĭu… hlôi đei jang đang ngăl.

Khul linh vei lăng tơ ring sơ lam Dak Lak jang hơ doi hăm Anih vei lănmg pôk rơih Dak Lak hơ met tôm tơ drong vă pơ gơ̆r pôk rơih hrôih tơ̆ dôm Kơ đông linh păng Tiểu đoàn pơ tâp pơ hrăm

Linh Binh nhất Hà Văn Piêng 21 sơ năm, găh Kơ đông linh 737 tơ roi, ‘nâu jĭ ‘măng mă blŭng kơ dih kâu vang năm tăh hla. Kơ tĕch khei ‘nâu, tơ gĕch ƀât jơ pơ dơ̆h đơ̆ng rŏng dôm ‘măng năm bơ̆ jang, ‘nhŏng kŭm hăm bôl boăl đa năm tơ̆ hnam hôp đei pơ klĕm hơ năn bơ ngai lĕch pơ jei vă chă hơ len năng, vă rơih bơ ngai tang măt. Truh dang ei, kŭm hăm băt hơ dăh tơ drong jang, arih xa kơ dôm bơ ngai lĕch pơ jei, rim bơ ngai lơ̆m kơ đông hlôi iŏk đei kơ phĭu bơ ngai tăh hla, vă năm tăh til pơ gê tơ ning, ‘năr 22/5.

“Inh hơ nơ̆ng đŏk hơ len tơ drong jang, arih xa kơ dôm bơ ngai lĕch pơ jei mât jang lơ̆m Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring đơ̆ng 2021 – 2026. Inh hơ pơi ‘mĕh chă rơih đei dôm bơ ngai rơ gei, đei jơ hngâm đon ‘lơ̆ng vang mât jang lơ̆m Kuô̆k hô̆i păng Jơ nŭm pơ gơ̆r kon pơ lei jơ̆p tơ ring vă đe sư tơ gop jơ hngâm vang pơ jing pơ lei pơ la, tĕh đak pơ drŏng, ‘lơ̆ng rŏ.”

Bơ ngai tang măt ăn dôm Grŭp pôk rơih pơ klĕm hơ năn bơ ngai lĕch pơ jei vă bơ ngai tăh hla chă hơ len năng tơ drong arih, bơ̆ jang đơ̆ng đe sư

Thượng tá Nguyễn Xuân Sơn – Kơ dră jang Chinh trĭ tơ̆ Kơ đông linh 737 ăn tơ băt, bơ̆ jang kiơ̆ nơ̆r pơ tho đơ̆ng Anih chĕp kơ̆l pơ gơ̆r khul linh ƀô đô̆i vei lăng tơ ring sơ lam Dak Lak kŭm nhen đơ̆ng kơ pal tơ jur găh tơ lĕch trong pơ gơ̆r pôk rơih hrôih, lơ năr âu ki, Khul chĕp kơ̆l Đảng păng Khul kơ dră pơ gơ̆r kơ đông pơ gơ̆r lơ ‘măng roi tơ băt găh Luơ̆t pôk rơih, roi tơ băt tơ drong jang, arih xa đơ̆ng dôm bơ ngai tang măt, tơ drong gơ̆h jang păng hơ năp athei jang đơ̆ng bơ ngai tăh hla truh hăm đe kăn ƀô̆, linh lơ̆m kơ đông. Athei 9 ‘nu kăn ƀô̆ đơ̆ng kơ đông jang hơ doi hăm Anih vei lăng pôk rơih dêh char Dak Lak pơ jing grŭp pôk rơih; chih hơ năn bơ ngai tăh hla, pơ klĕm tôch rơ đăh tơ drong arih, bơ̆ jang đơ̆ng bơ ngai tang măt ăn đe kăn ƀô̆, linh chă rơih. Hơ dai hăm ‘nŏh, Khul chĕp kơ̆l Đảng lơ̆m kơ đông oei athei pơ gơ̆r gak mă ‘lơ̆ng, hơ tŏk tơ drong dăr joang, vei lăng ‘lơ̆ng tơ drong sơ đơ̆ng tơ̆ tơ ring sơ lam păng dôm anih tăh hla, mă loi ƀât mă jĭ Covid – 19 oei đei tôch hơ mơt hrei ‘nâu.

“Truh dang ei nhôn hlôi hơ met đang rim tơ drong vă pơ gơ̆r pôk rơih hrôih. Đĭ đăng ƀăng rôn, che chih chư, hơ năn bơ ngai tăh hla păng bơ ngai tang măt đei hơ tol, pơ klĕm đang ngăl bơih, kơ thŭng mong kơ phĭu kŭm đei pơm đang; kơ phĭu kŭm đei ƀơk ăn rim kăn ƀô̆, linh lơ̆m kơ đông bơih. ‘Ngoăih kơ ‘nŏh, yoa jĭ Covid – 19 oei tôch hơ mơt, nhôn pơ gơ̆r tơ păt ‘lơ̆ng kiơ̆ đơ̆ng akŏm khul linh quân y pơ gơ̆r pruih pơ gang pơ lôch pơ rang jĭ tơ̆ rim anih tăh hla, adrol kơ tăh hla 'nŏh vă pơ tŏ hơ yuh hơ kâu, athei gom muh măt, dơ̆ng hơ tăih băl vă pơ gơ̆r tăh hla sơ đơ̆ng 'lơ̆ng.”

 Ƀô đô̆i vei lăng tơ ring sơ lam Dak Lak dang ei vei lăng trong sơ lam kơ jung hlŏh 74 km, tơ til hăm dêh char Muldunkiri, tĕh đak Campuchia. Kiơ̆ Đại tá Phạm Hữu Chiến – Kơ dră jang Chinh trĭ Ƀô đô̆i vei lăng tơ ring sơ lam dêh char Dak Lak, yoa tơ drong jang pha ƀiơ̆, đei nơ̆r asong đơ̆ng Anih vei lăng pôk rơih tĕh đak, 7 kơ đông linh vei lăng tơ ring sơ lam păng tiểu đoàn pơ tâp pơ hrăm găh Ƀô đô̆i vei lăng tơ ring sơ lam Dak Lak vă pơ gơ̆r pôk rơih hrôih ƀiơ̆ 1 năr.

Khul linh vei lăng tơ ring sơ lam Dak Lak đei 8 anih pôk rơih hrôih bơ ngai tang măt Kuôưk hô̆i pănmg Jơ nŭm pơ gơ̆r kon pơ lei jơ̆p tơ ring đơ̆ng 2021 - 2026 

Đại tá Phạm Hữu Chiến tơ roi, vă pơm ‘lơ̆ng ăn tơ drong pôk rơih đei pơ gơ̆r sơ đơ̆ng kŭm nhen vei kơ jăp tơ drong sơ đơ̆ng tơ̆ tơ ring sơ lam tĕh đak lơ̆m khei ‘năr jĭ Covid – 19 oei tôch hơ mơt, kơ đông jang hơ doi hăm Anih vei lăng pôk rơih dêh char Dak Lak pơ jing 8 grŭp pôk rơih tơ̆ 7 kơ đông linh vei lăng tơ ring sơ lam păng tiểu đoàn pơ tâp pơ hrăm vă pơ yoa ăn pôk rơih. Tơ drong hơ met ăn pôk rơih hrôih jang đang ngăl bơih, oei gô bơ ngai tăh hla đơ̆ng dôm kơ đông truh đĕch:

“Nhôn jang hơ doi hăm khul kơ dră tơ ring pơ jing dôm anih pôk rơih, anih tăh hla tơ̆ dôm kơ đông păng tiểu đoàn pơ tâp pơ hrăm, rim tơ drong hơ met đei jang đang ngăl bơih. Yoa tơ drong jang đơ̆ng khul linh athei trư̆k, gak vei kơ jăp tơ ring sơ lam, tang găn bơ ngai mât lĕch glăi luơ̆t ƀât mă jĭ Covid – 19 oei tôch hơ mơt dang ei, nhôn vă klăih song khul jang, pơ lơ̆h băl năm tơ̆ dôm anih tăh hla vă pôk rơih; dôm anih gak hơ tăih kơ anih pôk rơih 'nŏh Khul vei lăng pôk rơih vă chĕp ba kơ thŭng mong kơ phĭu truh ăn đe kăn ƀô̆, linh tơ̆ anih gak 'nŏh tăh hla mă trŏ hăm tơ drong hơ găt đơ̆ng Luơ̆t pôk.”

Hăm tơ drong hơ met ‘lơ̆ng tôm tĕch găh anih tăh hla, tơ mam drăm, vei lăng sơ đơ̆ng, tơ lĕch trong tang găn ‘lơ̆ng jĭ Covid – 19 oei tơ pŏh tôch hơ mơt hrei ‘nâu đơ̆ng Ƀô đô̆i vei lăng tơ ring sơ lam Dak Lak păng Anih vei lăng pôk rơih dêh char, kơ hrĕng ‘nu bơ ngai tăh hla ‘nŏh jĭ đe linh tơ̆ tơ ring sơ lam Dak Lak hlôi hơ met đang rim tơ drong ăn năr lêh tih, năm tăh hla vă chă rơih dôm bơ ngai tang măt rơ gei hlŏh mât jang lơ̆m Quốc hội jăl XV păng Jơ nŭm pơ gơ̆r kon pơ lei jơ̆p tơ ring đơ̆ng 2021 – 2026.

            Tuấn Long: Chih

Dơ̆ng: Tơ blơ̆