VOV4.Bahnar - Jang kiơ̆ athei đơ̆ng Khŭl kơ dră teh đak păng Anih tơm vei lăng khŭl linh teh đak, tơ drong jang tang găn jĭ  COVID-19 lơ̆m trong sơ lam tơ̆ dêh char Kon Tum tŏk bŏk hơ nơ̆ng đei khŭl linh vei lăng tơ ring sơ lam hơ tŏk loi dơ̆ng hăm lơ trong jang vă tang găn jĭ mơ̆t tơ poh lơ̆m tơ ring.

            Tơ ring ‘măng jang sơ lam apŭng plĕnh teh Bờ Y, găh xăh Pờ Y, apŭng Ngọc Hồi, dêh char Kon Tum đei hloh 20km trong sơ lam tơ til teh đak buăl Lào păng Campuchia ling lang đei ƀôh hơ mơt kơ kon pơ lei đơ̆ng păh to tơ ring sơ lam mơ̆t lơ̆m tơ ring glăi. Tơ̆ hơ năp tơ drong kơ pal, Kơ đông linh vei lăng tơ ring ‘măng jang sơ lam apŭng plĕnh teh Bờ Y hlôi pơ jing 6 grŭp, hơ nih răp găn vei lăng jĭ COVID-19 dơ nơ̆ng păng chă nơ năm. Tơ̆ dôm hơ nih găn âu kŭm hăm 45 kang ƀô̆, khŭl linh vei lăng tơ ring sơ lam oei đei khŭl linh kon pơ lei kơ xăh pơ vei tơ drong bơ̆ jang, dăr joang tơ ter trong sơ lam prăt năr prăt măng. Thiếu tá Đoàn Xuân Trường, Phŏ kơ dră Khŭl krao hơ vơn tơ pôl, Kơ đông linh vei lăng ‘măng jang sơ lam apŭng plĕnh teh Bờ Y tơ băt, rim kang ƀô̆, khŭl linh vang jang lơ̆m rim grŭp, hơ nih răp găn adoi hơ drin yak hloh mơ mat tat vă jang đang ‘lơ̆ng hơ năp jang:

            “Nhôn măng năr jang lơ̆m grŭp, hơ nih răp găn păng dăr joang vei lăng ư̆h kơ lê̆ hlot bơ ngai păng vei lăng kơ jăp ư̆h kơ lê̆ jĭ tơ poh lanh. Mă đơ̆ng ‘nhŏng oh tơ̆ grŭp, hơ nih răp găn kŭm tôch kơ mơ mat tat, găh tơ mam drăm kơ ƀăh kơ ƀôch. Đang kơ ‘noh năm vih vơ̆t mơ mat tat mă  lei ‘nhŏng oh hơ met pơ ‘lơ̆ng mơ mat tat vă jang đang ‘lơ̆ng hơ năp jang”.   

Kang ƀô̆, khŭl linh kơ đông linh vei lăng tơ ring sơ lam ‘măng jang sơ lam apŭng plĕnh teh Bờ Y dăr jiang vei lăng tang găn jĭ COVID-19 lơ̆m tơ ring sơ lam

Kŭm hăm hơ tŏk loi dơ̆ng vei lăng, tang găn tơ drong kon pơ lei păh to tơ ring sơ lam mơ̆t glăi tơ̆ tơ ring, Kơ đông linh vei lăng ‘măng jang sơ lam apŭng plĕnh teh Bờ Y kŭm tŭn pran tơ drong jang tơ roi tơ băt, tang găn jĭ  COVID-19 ăn tơ moi tơ mang lăng păng kon pơ lei đei mỉ roh jang sa jê̆ tơ ring sơ lam. Kang ƀô̆ khŭl linh Kơ đông linh vei lăng tơ ring sơ lam năm tơ̆ rim hnam pơ tho kon pơ lei gom muh măt mư̆h năm jang mir păng pơm kiơ̆ dôm tơ drong pơ kăp tang găn jĭ; ư̆h kơ mơ̆t lĕch tơ̆ tơ ring sơ lam mư̆h năm jang mir glăi... Pơ tôch ăn ƀôh kŭm hăm hơ tŏk đon băt kơ dih găh tơ drong krê hơ mơt đơ̆ng jĭ COVID-19, rim ‘nu kon pơ lei tơ̆ tơ ring sơ lam oei jing bơ ngai tơ gŭm ăn khŭl linh vei lăng tơ ring sơ lam lơ̆m tơ drong jang tang găn jĭ păng vei lăng tơ ring sơ lam. Yă Nang Cứu, hnam oei tơ̆ plei Iệc, xăh Pờ Y đei mir jê̆ tơ ring sơ lam hăm teh đak buăl Lào tơ băt:  

            “Mư̆h jang mir tơ̆ âu kon pơ lei hơ nơ̆ng đei kang ƀô̆ linh vei lăng tơ ring sơ lam tơ roi tơ băt. Kon pơ lei lơ̆m pơ lei păng ĭnh tơ ƀơ̆p bơ ngai hlĭch tơ roi tơ băt ăn kơ đe ma linh vei lăng tơ ring sơ lam băt.”

Tơ roi tơ băt tang găn jĭ COVID-19 ăn kon pơ lei tơ ring sơ lam yua đơ̆nG kơ đông linh vei lăng ‘măng jang sơ lam apŭng plĕnh teh Bờ Y vei lăng

Trung tá Đặng Nguyên Hương, Bí thư Đảng ủy, Bơ ngai jang Chĭnh trĭ Kơ đông linh vei lăng ‘măng jang sơ lam apŭng plĕnh teh Bờ Y tơ băt, kang ƀô̆, khŭl linh Kơ đông hơ drin ư̆h kơ lê̆ đei ư̆h kơ ê tơ̆ hơ năp đei ƀôh tơ plih đơ̆ng jĭ COVID-19:

            “Tơ̆ hơ năp đei ƀôh tôch kơ krê hơ mơt đơ̆ng jĭ COVID-19 tơ̆ Campuchia păng Lào, nhôn hlôi tơ lĕch jang lơ trong jang bơ̆ jang vei lăng vă băt hơ dăh tơ drong jĭ COVID-19 tơ̆ păh to tơ ring sơ lam vă kơ pơ gơ̆r tơ roi tơ băt ăn kơ tơ pôl Kon pơ lei păng kang ƀô̆, khŭl linh lơ̆m anih jang băt hơ dăh tơ drong găh jĭ hơ buh vă tơ lĕch jang tơ drong jang tang găn jĭ COVID-19. Hơ drin ư̆h kơ lê̆ jĭ tơ poh lanh klĕch tơ ring sơ lam mơ̆t lơ̆m tơ ring păng mơ̆t lơ̆m anih jang.”

            Tơ̆ hơ năp đei ƀôh krê hơ mơt đơ̆ng jĭ COVID-19, đei trong sơ lam kơ jung hloh 292km tơ til teh đak buăl Lào păng Campuchia, khŭl linh vei lăng tơ ring sơ lam Kon Tum dang ei tŏk bŏk pơ vei 66 hơ nih răp găn, hăm hloh 400 kang ƀô̆, khŭl linh tơ ter trong sơ lam vă jang kiơ̆ hơ năp jang hơ dai vei lăng răh tơ ring sơ lam teh đak păng tang găn răh jĭ COVID-19 iŏk đei jơ nei.

                         Khoa Điềm : Chih

Thuem: Tơ blơ̆