VOV4.Bahnar - Tơ̆ hơ năp tơ drong jĭ Covid-19 oei tôch hơ mơt, truh pơ gê (4/5), lơ̆m tĕh đak đei 9 dêh char, plt asong ăn hŏk tro pơ gơ̆h hŏk klĕp truh nơ̆r athei plơ̆ng dơ̆ng. ‘Nŏh jĭ plt Hà Nội, Bắc Giang, Hà Nam, Vĩnh Phúc, Hưng Yên, Yên Bái, Đà Nẵng, Quảng Nam, An Giang.

Vă pơm ‘lơ̆ng ăn tơ drong pơ tho, hŏk pơ hrăm dôm hnam trưng vă pơ gơ̆r pơ tho hŏk trư̆k tuyê̆n. Tơ̆ dêh char Vĩnh Phúc, tơ ring jĭ Covid 19 oei tôch hơ mơt, vă pơm ‘lơ̆ng sơ đơ̆ng ăn hŏk tro, Dơ nŏ ani vei lăng kon pơ lei dêh char đei nơ̆r athei asong ăn hlŏh 300.000 ‘nu hŏk tro đơ̆ng mâu yăo truh lăm 12, anih pơ tho pơ hrăm hơ nơ̆ng păng pơ tho tơ drong jang tơ̆ dêh char pơ dơ̆h hŏk đơ̆ng ‘năr 3/5 truh đĭ ‘năr 8/5.

Đơ̆ng rŏng kơ ‘nŏh lăng kiơ̆ tơ drong jĭ tơ̆ yăn âu, Dơ nŏ anih vei lăng kon pơ lei dêh char vă set hơ len, tơ lĕch nơ̆r pơ ma plơ̆ng dơ̆ng. Tơ̆ dêh char Hưng Yên, Anih vei lăng pơ tho pơ hrăm dêh char apĭnh Dơ nŏ anih vei lăng kon pơ lei dêh char asong ăn hŏk tro lơ̆m dêh char pơ dơ̆h hŏk đơ̆ng ‘năr 4/5 truh đei nơ̆r tơ roi plơ̆ng dơ̆ng vă tang găn tơ drong jĭ COVID-19.

Dơ̆ng: Tơ blơ̆