VOV4.Bahnar – Kơtơ̆ng ang ăh 'năr dơ̆ng năr 31/5 đơ̆ng Anih tơm Y tê̆ ăn tơbăt, đei dơ̆ng 68 'nu bơngai ƀơm jĭ COVID-19 lơ̆m teh đak, adrô̆ Bắc Giang đei 48 'nu, Bắc Ninh 4 'nu jĭ, Hà Nội 12 'nu jĭ, Long An 2 'nu, Đăk Lăk 1 'nu jĭ păng Đà Nẵng 1 'nu jĭ. Duh lơ̆m pơgê năr 31/5, Hnam pơgang Trung ương Huế hlôi pơm lêh axong Khul thây pơgang năm tơgŭm dêh char Bắc Giang tơjră pơrang jĭ Covid-19. Khul đei 18 'nu kang ƀô̆, bơngai jang y tê̆ jing dôm bơngai juăt jang lơ̆m dôm tơdrong jang hơmet tenh, hơmet jĭ plei nuih, hơmet ƀơm pơnhŭl. Atŭm hăm noh vang hơmet jĭ, chơ chă bơngai oei tơjê̆ hăm bơngai jĭ... dôm bơngai juăt jang kơ Hnam pơgang Trung ương Huế gô tơroi khoa hŏk vă tơroi găh tơdrong hlôh vao lơ̆m tơdrong vei lăng păng hơmet bơngai ƀơm jĭ Covid-19. Adrol kơ noh, Anih vei lăng kon pơlei plei tơm Đà Nẵng duh hlôi tơklăh ti hăm 10 'nu ƀak sih, điêu yưng năm tơgŭm ăn dêh char Bắc Giang lơ̆m tơdrong hơmet, tang găn păng tơjră jĭ Covid-19. Thư̆ trưởng Anih tơm Y tê̆ Nguyễn Trường Sơn ăn tơbăt, Anih kơchăng axong 500 sinh viên hnam trưng Cao đẳng y tê̆ Bạch Mai păng hloh 400 'nu jang y tê̆ nai tơgŭm ăn Bắc Giang.

Lan chih păng pơre nơ̆r