VOV4.Bahnar - Pơ gê (6/7), pơ ma nuh hăm khul chih hla ar tơ roi, bơ ngai tang măt ăn Anih vei lăng tơ drong ‘lơ̆ng, Anih tơm vei lăng pơ tho pơ hrăm ăn tơ băt, jô̆ truh ‘năr 16h30 năr 5/7/2021, lơ̆m tĕh đak đei 11.551 ‘nu hŏk tro tơ̆ 39 dêh char, plt athei thi tốt nghiệp THPT đợt 2 yoa đơ̆ng jĭ Covid-19, lơ̆m nŏh lơ hlŏh jĭ 2 dêh char Bình Định (2.569 ‘nu) păng Bắc Giang (2.477 ‘nu).

Kiơ̆ trong jang đơ̆ng Anih tơm vei lăng pơ tho pơ hrăm, đe hŏk tro âu vă thi tốt nghiệp THPT đợt 2, khei ‘năr thi gô đei Anih tơm vei lăng pơ tho pơ hrăm chih tơ lĕch, lăng kiơ̆ tơ dỏng jĭ tơ̆ yăn âu. Đe hŏk tro oei đei, huei ƀơm kơ nê̆ đơ̆ng jĭ Covid-19 vă thi tốt nghiệp THPT đợt 1 đơ̆ng ‘năr 7/7-8/7.

Hơ dai hăm ‘nŏh, Anih tơm vei lăng pơ tho pơ hrăm oei vă set điêm mât hŏk đăi hŏk 1 ‘măng đơ̆ng rŏng kơ 2 đơt thi tốt nghiệp THPT vă vei lăng ‘lơ̆ng tơ drong đei yoa, hơ tŏ băl ăn rim hŏk tro. Yoa thoi nŏh, hŏk tro thi đơt 2 lê̆ pơ ngơ̆t kiơ găh tơ drong set điêm vă mât hŏk đăi hŏk.

Dơ̆ng: Tơ blơ̆