VOV4.Bahnar - Tơ blăh jơ nei đơ̆ng ‘năr 2 truh 5/8/1964 ‘nŏh jĭ tơ drong hưch hanh, čhôk ‘nă đơ̆ng kơ băt dôm jơ hnơr kăn ƀô̆, linh găh Khul linh đak dơ sĭ. Jĭ khul linh vang tơ blăh lơ̆m tơ drong tơ blăh jơ nei mă blŭng đunh kơ âu 57 sơ năm, rim jơ hnơr kăn ƀô̆, linh Lữ đoàn 170 Tơ ring 1 Khul linh đak dơ sĭ ưh hli mơ mat tat, gleh hrat, mât 1 jơ hngâm hơ nơ̆ng jang tŏk jing khul linh tơm dơ nơm vei lăng tơ drong pơm tơm tơ̆ achon đak dơ sĭ găh Tu kơ tĕh đak.

Dôm năr âu, mă đơ̆ng tŏ ‘mi kial ưh ‘lơ̆ng đơ̆ng ‘năr tŏ hang păng tơ drong jĭ Covid-19, kăn ƀô̆, linh đak dơ sĭ Khul 135,  Lữ đoàn 170 oei hơ nơ̆ng pơ tâp pơ hrăm tơ drong vang tơ blăh hơ dai. Pơm kơ đông oei tơ̆ dêh char Quảng Ninh, Lữ đoàn 170, bơ̆ jang tơ drong tang găn jĭ hai, vei kơ jăp khul linh, tơ mam kơ măy kơ mŏk kơ chăk tơ blăh hai. Đĭ đăng kăn ƀô̆, linh đơ̆ng Lữ đoàn oei bơ̆ jang ‘lơ̆ng dôm trong jang tang găn jĭ, mă loi ‘nŏh tơ drong hơ găt “5K” đơ̆ng Anih tơm jang pơ gang. Hơ dai hăm hơ met tôm đak pơ gang vă pruih pơ lôch pơ rang jĭ, gom muh măt păng pơ tŏ hơ yuh hơ kâu hơ nơ̆ng, nhôn pơ tho ăn dôm anih jang, khul linh klăih song, ăn kăn ƀô̆, linh pơ jing khul grŭp klăih song băl jơ năr pơ tâp pơ hrăm. Đơ̆ng kơ đông khul linh đak dơ sĭ âu, lơ ƀato đơ̆ng Lữ đoàn 170 năm bơ̆ jang, păng jang ‘lơ̆ng rim tơ drong đei pơ jao. Chĕp vei tơ drong juăt đơ̆ng rim jơ hnơr hơ drol, đei kăn ƀô̆, linh đơ̆ng Lữ đoàn hrei 'nâu hơ nơ̆ng pơ tâp pơ hrăm, hơ tŏk đon jang chinh trĭ; hơ tŏk tơ drong pơ tâp pơ hrăm vă gơ̆h hlôh vao kơ jăp găh ki thuơ̆t păng hơ nơ̆ng đei đon kơ chăng tơ blăh. "Čhôk 'nă, hưch hanh đei jing kăn ƀô̆, linh lơ̆m khul linh vang năm tơ blăh iŏk đei jơ nei blŭng a", 'nŏh jĭ đon tơ chĕng đơ̆ng đĭ đăng kăn ƀô̆, linh đak dơ sĭ Khul 135, Lữ đoàn 170.

Prăh kơ nong tơ blăh 53-VA sơ năm 2019 tơ̆ Lữ đoàn 170

Thượng úy Trần Văn Cảnh, Kơ dră anih vei lăng ƀrâm unh tơ̆ ƀato 354, linh đak dơ sĭ Khul 135 ăn tơ băt: Dôm ƀai hŏk, dôm tơ drong juăt kăp gĭt đơ̆ng jơ hnơr adrol ‘nŏh jĭ dôm tơ drong tơ roi pơ tho tơ ƀôh jơ năr bơ̆ jang lơ̆m ƀato vă tơ tă ăn đe kăn ƀô̆, linh hơ nơ̆ng pơm hơ tŏk đon hlôh vao, đon adrin vă bơ̆ jang đang rim tơ drong jang lơ̆m rim jơ năr:

“Jĭ jơ hnơr mơ lôh đei arih lơ̆m chăl rơ ngei păng iŏk yoa dôm tơ drong jơ nei đơ̆ng tơ drong plang hơ kâu, kơ sư̆k tih tên đơ̆ng rim jơ hnơr năm hơ drol, kăl loi đei bơ̆ jang tơ̆ lữ đoàn ƀato jĭ khul linh blŭng a tơ blăh jơ nei đơ̆ng Khul linh đak dơ sĭ kon pơ lei Việt Nam, kơ dih kâu inh ƀôh tôch hưch hanh păng ƀôh hơ dăh hơ năp jang trăp trĭn đơ̆ng kơ dih hai”.

Thiếu tá Phạm Tố Chinh, Bơ ngai jang Chính trị linh đak dơ sĭ Khul 135 ăn tơ băt: dôm ƀai hŏk đơ̆ng sơ̆ lơ̆m tơ drong tơ blăh blŭng a ‘năr 2 păng 5-8-1964 hlôi tơ iung jơ hngâm đon hưch hanh, ‘nă hal păng đon adrin khŏm bơ̆ jang mă ‘lơ̆ng đơ̆ng đe kăn ƀô̆, linh đak dơ sĭ hrei ‘nâu, chu hŭt hiong kơ dih kâu vă vei lăng tơ drong pơm tơm tơ̆ đak dơ sĭ, kông đak dơ sĭ kơ tĕh đak:

“Vă hơ tŏk đon rơ gei kŭm nhen jơ hngâm pran đơ̆ng đe kăn ƀô̆, linh blŭng a ‘nŏh athei pơ tho tơ ƀôh găh đon tơ chĕng, hlôh vao hơ dăh găh tơ drong bơ̆ jang, dôm tơ drong mơ mat tat lơ̆m tơ drong jang, đơ̆ng nŏh gơ̆h băt hơ dăh tơ drong jang đei pơ jao, pơ jing tơ drong hiôk hian vă đe linh bơ̆ jang đĭ jơ hngâm, hơ tŏk đon tơ năp, pơ tâp pơ hrăm păng kăl loi pơ tho tơ ƀôh lơ̆m khei ‘năr pơ tâp, kơ chăng tơ blăh kŭm nhen hŏk pơ hrăm lơ̆m khul linh, pơ ma nuh găh dôm tơ drong kăl đơ̆ng jơ hnơr adrol vă tơ iung đon tơ năp đơ̆ng kơ dih”.

Kăn ƀô̆, linh Lữ đoàn 170 Tơ ring 1 Khul linh đak dơ sĭ hơ met phao năr ki thuơ̆t

Dôm sơ năm tơ jê̆ âu, lơ̆m ƀiên chê̆ kơ linh đak dơ sĭ Khul 135 đei dơ̆ng lơ ƀato tơ blăh 'nao. Chă hơ len năng tơ drong pơ tâp pơ hrăm, kơ chăng tơ blăh păng pơm lăp hăm dôm ki thuơ̆t 'nao, 'nŏh jĭ tơ drong jang hơ nơ̆ng đơ̆ng kơ dră chĕp kơ̆l, yŏng khul linh tơ̆ Lữ đoàn 170, vă năm truh tơ drong tơm kăl hlŏh: bơ ngai păng phao kơ toang, kơ măy ki thuơ̆t hơ nơ̆ng kơ chăng jang đang 'lơ̆ng rim tơ drong đei pơ jao. Thượng tá Tô Hồng Quân, Chính ủy Lữ đoàn 170, Tơ ring 1 Khul linh đak dơ sĭ tơ roi: kăn ƀô̆, linh Lữ đoàn 170 kơ tang nuih mơng hơ nơ̆ng chĕp vei lơ̆m jơ hngâm đon kơ dih, đon pơ hnŏng khŏm vei lăng 'lơ̆ng tơ drong pơm tơm tôch kăp gĭt kơ tĕh đak.

“Hŏk pơ hrăm, bơ̆ jang tơ̆ khul linh đei lơ tơ drong juăt ‘lơ̆ng đơ̆ng ƀô đô̆i 'nŏh tôch hưch hanh, lữ đoàn oei hơ tŏk trong pơ tho ăn ƀô đô̆i gơ̆h iŏk yoa tôm kơ măy kơ mŏk ki thuơ̆t, hơ tŏk đon kơ chăng adrin yak hlŏh rim tơ drong mơ mat tat, pơ jing đei đon jang chinh trĭ kơ jăp 'lơ̆ng”.

Đơ̆ng tơ drong tơ blăh jơ nei blŭng a sơ̆, rim jơ hnơr kăn ƀô̆, linh hrei ‘nâu hlôi tơ iung đei jơ hngâm đon "hưch hanh", hơ tŏk jơ hngâm pran tih tên vă pơ jing 1 Lữ đoàn 170 pran kơ jăp, tơ găl hăm khul linh tơ blăh kơ tang kơ kon pơ lei tơ̆ jih đak dơ sĭ găh Tu tĕh đak bơ̆n.

Dŏng: Tơ blơ̆