VOV4.Bahnar -Hơnơ̆ng hop akŏm hăt hot ‘măng mă blŭng, Kuô̆k hô̆i jăl XV hlôi pơma dơnŭh găh trong vă pơjing Tơdrong tơchơ̆t găh trong bơ̆ jang tơgŭm djru jăl jang, jên hu vă tơgum ăn Tơdrong jang hơmet pơ ‘lơ̆ng păng atŏk tơ iung mŭk drăm-tơpôl. Rim Kơdră tang măt pơma hơdăh trŭh tơdrong pơm sơđơ̆ng jang mŭk drăm ‘nŏh tôch gĭt kăl; kăl lăng kơ jăp trŭh găh tơdrong kơ jă tŏk jur, tĕh đak hre, hiong răm kon jên jang tĕh đak. Rim nơ̆r tơgop athei dăr lăng kơ jăp tơnô̆ tơgum djru, veh ver tơdrong sa pơjĭp đơ̆ng trong jang tơgum ăn. Lơ kơdră tang măt akhan, Tơdrong vă pơjing Tơdrong tơchơ̆t pơtrŭh ăn Kuô̆k hô̆i ‘măng mă au ‘nŏh jing trong jang tôch kơ lăp, tôch kơ ƀlep, mă lei ‘nau jei jing tơdrong jang tôch mơmat tat, tơdrong long kăl pơ koĕl jang mă gơ̆h hơgei păng kơrŭn đĭ jơhngơ̆m. Kiơ̆ đơ̆ng rim kơdră tang măt, tơdrong pơtrŭh ăn jang kăl pơm kiơ̆ ƀlep tơdrong pơkăp, trong tơlĕch jang. Tơdrong tơchơ̆t klăh asong vă jê̆ 350.000 ti hlak jên ăn lơ tơdrong jang phara dĭh băl, đei dôm trong jang đei klăh asong kơtă hloi, đei dôm tơdrong jang ‘moi kiơ̆ bơ̆ jang thuê̆, bơ̆ jang tơgŭm tơjur jên chĕh.

Tơblơ̆ nơ̆r: Amazưt