VOV4.Bahnar - ‘Năr brei 19/8, Jơ nŭm pơ gơ̆r kon pơ lei dêh char Dak Nông jăl IV, đơ̆ng 2021- 2026 pơ gơ̆r hop akŏm mă 2.  Kiơ̆ nơ̆r roi tơ băt lơ̆m hop akŏm, 6 khei blŭng sơ năm 2021, lơ̆m dêh char đei 7 grŭp tơ drong hơ găt atŏk tơ iung mŭk drăm, tơ pôl hlôi jang đei lơ.

Jơ hop akŏm Jơ nŭm pơ gơ̆r kon pơ lei dêh char Dak Nông

Tơ drong jang tŏk jô̆ atŭm đơ̆ng dêh char đei 6,03%. Akŏm đĭ đăng jên thu mong ăn tĕh đak đei 1.582 ti, tŏk 29% pơ têng hăm khei âu sơ năm 2020 păng iŏk đei 58% kơ sô̆ đơ̆ng dêh pơ jao. Mă lei yoa đơ̆ng jĭ Covid-19 oei tôch hơ mơt ƀơm kơ nê̆ truh tơ drong jang atŏk tơ iung mŭk drăm tơ pôl kơ dêh char.

Lơ̆m hop akŏm âu, dôm bơ ngai tang măt vă set hơ len, tơ chơ̆t lơ tơ drong gĭt kăl. Kơ dră Jơ nŭm pơ gơ̆r kon pơ lei dêh char Dak Nông ăn tơ băt, hop akŏm mă âu đei tơ drong jang tôch lơ. Yoa thoi nŏh rim khul grŭp, anih jang athei kơ chăng, adrin hlŏh dơ̆ng, bơ̆ jang mă tơ năp, gơ̆h hơ gei đei yoa, lăp hăm khei ‘năr jĭ Covid-19 oei tơ pŏh tôch hơ mơt hrei ‘nâu, vă gơ̆h jang kĕh dôm tơ drong jang atŏk tơ iung mŭk drăm, tơ pôl đơ̆ng dêh char.

Dơ̆ng: Tơ blơ̆