VOV4.Bahnar - Pơ gê ‘nâu, 20/10, hop akŏm mă 2 Kuô̆k hô̆i jăl XV pơ tơm pơ gơ̆r. ‘Măng hop akŏm pơ gơ̆r kiơ̆ trong trư̆k tuyê̆n hơ dai hăm hôp atŭm tơ̆ Hnam Kuô̆k hô̆i păng đei pơm 2 đơt: đơt 1 hôp trư̆k tuyê̆n đơ̆ng ‘năr 20 – 30/10, đơt 2 hôp hơ dai đơ̆ng ‘năr 8-13/11. Thoi nŏh, Kuô̆k hô̆i vă bơ̆ jang lơ̆m 17 năr, lơ̆m nŏh, hơ met hiă trong hop akŏm trư̆k tuyê̆n đĭ đăng hloi tơ dăh jĭ Covid – 19 oei tơ pŏh krê hơ mơt.

Kiơ̆ tơ drong vă jang, Khul kơ dră tĕh đak hơ met hlŏh 50 hla ar chih tơ roi, tơ drong vă jang vă tơ roi ăn Kuô̆k hô̆i. Tơ̆ hop akŏm âu, Kuô̆k hô̆i oei vă set hơ len năng lơ hla ar chih tơ roi kăl, hơ len năng tơ drong jang kiơ̆ trong atŏk tơ iung mŭk drăm tơ pôl păng jên thu mong, tơ lĕch jang kơ tĕh đak sơ năm 2021, tơ drong jang tang găn jĭ COVID-19; tơ chơ̆t ăn trong jang atŏk tơ iung mŭk drăm tơ pôl sơ năm 2022, jên vă thu mong, tơ lĕch jang kơ tĕh đak păng trong klăih song jên trung ương sơ năm 2022 (lơ̆m nŏh đei tơ drong kơ dŭn khei ‘năr hơ met ming jên khei).

Dôm hla ar chih tơ roi găh tơ drong jang đơ̆ng Anih tơm sek tơ lang kon pơ lei, Anih tơm dăr hơ len kon pơ lei; dôm hla ar chih tơ roi găh: tơ drong tang găn xa pơ jĭp, tang găn tơ dỏng yoch păng pơm glăi luơ̆t, tơ drong jang pơm kiơ̆ nơ̆r sek phak sơ năm 2021; chih akŏm nơ̆r pơ ma, apinh păng tơ drong dăr lăng mưh sek tơ lang dôm tơ dỏng kăl... gô đei tơ roi ăn Kuô̆k hô̆i ‘năi. Kăl loi, Kuô̆k hô̆i vă hơ len năng, tơ chơ̆t trong iŏk yoa tĕh kơ tĕh đak đơ̆ng 2021 - 2030, trong jang truh sơ năm 2045 păng trong iŏk yoa tĕh 5 sơ năm (2021 - 2025); trong hơ met ming anih jang mŭk drăm đơ̆ng 2021-2025.

Kuô̆k hô̆i vă bơ̆ jang hơ nơ̆ng lơ̆m năr 6 păng năr 7 hloi, kiơ̆ trong ‘mơ ‘met jơ năr, kơ chăng bơ̆ jang ‘ngoăih jơ jang, bơ̆ jang thim tơ̆ kơ măng vă tơ jur ƀiơ̆ năr hôp mă lei oei pơm ‘lơ̆ng rim tơ drong. ‘Nâu kŭm jing tơ drong ‘mĕh vă tôch tơ găl đơ̆ng bơ ngai tăh hla lơ̆m tĕh đak ƀât oei bơ̆ jang kiơ̆ 2 tơ drong tơm, tang găn jĭ hai, akŏm jơ hngâm atŏk tơ iung mŭk drăm hai. 

Dơ̆ng: Tơ blơ̆