VOV4.Bahnar - Năr au, năr 20/7, ‘Măng hop akŏm mă blŭng, Kuôk hô̆i jăl XV pơgơ̆r blŭng a tơ̆ Hnam Kuô̆k hô̆i. Lơ̆m hlŏh 11 năr bơ̆ jang, Kuô̆k hô̆i ‘măn 3 năr ăn bơ̆ jang găh khŭl kơdră chĕp pơgơ̆r mŭh pơgơ̆r pôk rơ̆ih, kĭ tơchơ̆t hơdăh rim kơchư̆k kơdră chĕp pơgơ̆r kơ rim Dơnŏ anĭh bơ̆ jang Tĕh đak, lơ̆m au đei Kơdră chĕp pơgơ̆r Tĕh đak, Thủ tướng Tĕh đak păng Kơdră chĕp pơgơ̆r Kuô̆k hô̆i; lăng hơlen, pơma dơnŭh rim hla bơar chĭh tơbăt bơ̆ jang mŭk drăm-tơpôl păng tơchơ̆t mĭnh ƀar tơdrong kăl anai.

Kiơ̆ trong vă bơ̆ jang, tơ̆ pơgê lăp đơ̆ng rŏng Kơdră chĕp pơgơ̆r Kuô̆k hô̆i Vương Đình Huệ iung pơma pơgơ̆r hop akŏm blŭng, Tổng Bí thư Nguyễn Phú Trọng gô đei nơ̆r pơma gĭt kăl. Đơ̆ng rŏng ‘nŏh, Kuô̆k hô̆i hop akŏm hơdrô̆ vă lăng hơlen bơ̆ jang găh khŭl kơdră chĕp pơgơ̆r, pơdrơ̆ng kiơ̆ Tơdrong tơchơ̆t găh măt bơngai Kơ iĕng Kơdră chĕp pơgơ̆r Kuô̆k hô̆i, măt bơngai bơ̆ jang lơ̆m Dơnŏ anĭh chĕp pơgơ̆r Kuô̆k hô̆i jăl ‘nao. Tơ̆ kơsơ̆, rim kơdră tang măt tăh hla pôk tơmơ̆t Kơdră chĕp pơgơ̆r Kuô̆k hô̆i. Kiơ̆ tơdrong tơchơ̆t, Kơdră ‘nao chĕp pơgơ̆r Kuô̆k hô̆i gô pơma pơkăp mĭnh nơ̆r ƀơ̆r đon hăm Tĕh đak, hăm kon pơlei, hăm Khôi luơ̆t tơm tĕh đak. Đơ̆ng rŏng ‘nŏh pơgơ̆r pôk tơmơ̆t 4 ‘nu kơ iĕng Kơdră chĕp pơgơ̆r Kuô̆k hô̆i păng 12 ‘nu Kơdră bơ̆ jang lơ̆m Dơnŏ anĭh chĕp pơgơ̆r Kuô̆k hô̆i.

Tơblơ̆ nơ̆r: Amazưt