VOV4.Bahnar – Tơ̆ Hà Nội tŏk bŏk pơgơ̆r Hop akŏm ‘măng mă mônh, Kuôk hô̆i jăl 15. ‘Măng hop akŏm mă âu đei xơnong kăp gĭt hloh, pơjing trong pơm jang ăn Kuôk hô̆i jăl 15 ăh gô pôk, pơkăp keh đang bơngai jang hăm dôm kơchư̆k jang kơ dôm anih jang Teh đak păng pơkăp trong jang mŭk drăm, tơpôl, jên hu, jên mong, axong jang, tơdrong tơchơ̆t jang kơ teh đak, vă pơkăp trong jang ăn tơdrong pơm jang lơ̆m 5 xơnăm truh.

Tơdrong pơkăp axong bơngai jang kơpal kơ Teh đak jing tơdrong tơm kơ ‘măng hop akŏm mă blŭng lơ̆m jăl jang Kuôk hô̆i jăl 15. Kiơ̆ tơchơ̆t đơ̆ng Khôi luơ̆t teh đak xơnăm 2013, kơtă đơ̆ng rŏng kơ đei Kuôk hô̆i pôk jang, Kơdră Kuôk hô̆i, Kơdră teh đak, Thủ tướng teh đak, Kơdră Anih tơm xek tơlang tơdrong glăi lơ̆m tơpôl gô pơm Lêh tơchơ̆t tŏk pơgơ̆r tơ̆ anăp Kuôk hô̆i. Akŏp đei 50 kơchư̆k jang kơpal kơ dôm anih jang Teh đak đei Kuôk hô̆i pôk tơlĕch, kĭ pơkăp keh đang tơ̆ ‘măng hop akŏm âu. Găh Khul kơpal teh đak, lơ̆m ‘măng hop akŏm âu keh đang pôk 4 Phŏ Thủ tướng. Kơdră Jơnŭm bơngai tang măt ăn Kuôk hô̆i Nguyễn Thị Thanh ăn tơbăt, rim kơchư̆k kơpal hlôi đei tơroi hăm Ƀan châ̆p hanh Trung ương păng Anih tơm Chĭnh trĭ hlôi hơlen dôm Tơdrong jang đei tơrĕk truh kơchư̆k jang kơ Kuôk hô̆i păng Pơkăp bơngai jang kơ Jơnŭm pơgơ̆r teh đak: “Pơkăp Jơnŭm pơgơ̆r jang kơ Khul kơpal teh đak gô keh đang 27 kơchư̆k noh: Thủ tướng, 4 Phŏ Thủ tướng păng 18 ƀô̆ trưởng, 4 kơdră anih jang tơm. Tơdrong pơkăp hơlen hơdăh kiơ̆ xơkơ̆t pơtôch jăl jang kơ Jơnŭm pơgơ̆r teh đak đơ̆ng xơnăm 2016-2021 păng kiơ̆ tơdrong hơlen tôm tong găh tơdrong jang kang ƀô̆”.

Tơdrong keh đang Jơnŭm pơgơ̆r kơ teh đak noh ưh gơh adar. Tơdrong mă âu pơkăl xơnong jang tơnăp đơ̆ng rim bơngai tang măt lơ̆m rim tơdrong kăl hop akŏm, mă kăl noh lơ̆m pôk, pơkăp, keh đang 50 kơchư̆k jang kơpal kơ dôm Anih jang kơ Teh đak. Bơngai jang tang măt Phạm Văn Hòa, khul Đồng Tháp ăn tơbăt: “Xơnong jang kơ rim bơngai tang măt kăl akŏm, tơnăp tơbang đon lui, tơdrong lăp đon đơ̆ng rim kon pơlei lơ̆m ‘măng hop akŏm. Adrol hloh noh athei pôk đei 50 kơchư̆k jang dơnơm. Kơdră Kuôk hô̆i, dôm Phŏ Kơdră, rim bơngai vang jang; Kơdră teh đak, Phŏ Kơdră teh đak; Jơnŭm pơgơ̆r teh đak, Phŏ Thủ tướng; rim bơngai jang lơ̆m jơnŭm pơgơ̆r teh đak; Anih hơlen tơlen tơdrong glăi lơ̆m tơpôl; Anih xek tơlang tơdrong glăi; Anih tơm Hơlen tôm tơdrong... Inh kơchĕng âu jing xơnong jang kăp gĭt hloh”.

Atŭm hăm tơdrong axong bơngai jang, Kuôk hô̆i gô tơchơ̆t dôm tơdrong jang găh mŭk drăm – tơpôl, jên hu, jên mong kơ teh đak 6 khei kơ âu păng trong tơlĕch jang ăn 6 khei jê̆ đĭ xơnăm, mă kăl noh Tơdrong jang kơ đĭ jăl jang 15, noh jing tơdrong jang găh hơtŏk mŭk drăm – tơpôl, găh axong jang kơ teh đak, găh jên hu jên mong, mă kăl noh hre tơm păng dôm tơdrong tơrĕk truh jên hu đơ̆ng xơnăm 2021- 2025. ‘Nâu jing dôm tơdrong kăp gĭt, pơm trong ăn tơdrong pơm jang “tơchơ̆t jang hadoi” tơjră răh pơrang jĭ, hơtŏk răh mŭk drăm tơpôl, jing xơnong tơm kơ Kuôk hô̆i kiơ̆ luơ̆t tơchơ̆t. Ƀok Tổng thư kĭ, Kơdră Anih jang Kuôk hô̆i Bùi Văn Cường xơkơ̆t: “Mưh Kuôk hô̆i ưh đei pơkăp tơdrong jang 5 xơnăm găh mŭk drăm tơpôl gô tơnap tap hăm Jơnŭm pơgơ̆r teh đak lơ̆m tơdrong tơlĕch pơgơ̆r jang hơdăh. ‘Nâu jing trong Tơchơ̆t Hop akŏm 13 kơ Đảng. Kuôk hô̆i jing anih jang kơpal hloh kơ teh đak, athei hơlen đei dôm trong jang găh hơtŏk mŭk drăm – tơpôl. Mưh Kuôk hô̆i adar kơ hơlen noh găh axong jang kơ teh đak gô jing tơnap tap, roi pơm adar noh roi pơm ăn tơdrong hơtŏk tơ iung adar hloh”.

Mă oei pŭ răm đơ̆ng pơrang jĭ Covid-19 hăm tơdrong hơbuh hli hlơt, tơnap kơ hơmet klaih, mă lei lơ̆m pơkăp jang mŭk drăm – tơpôl, Jơnŭm pơgơ̆r teh đak duh oei pơtoi adrin pơm kiơ̆ “tơchơ̆t jang hadoi” vă tơdrong jang mŭk drăm hơtŏk tơ iung pran dơ̆ng. Jơnŭm pơgơ̆r teh đak drơ̆ng nơ̆r pơtruh ăn Kuôk hô̆i tam mă hơmet tơchơ̆t jang vă hơtŏk mŭk drăm – tơpôl xơnăm 2021 hlôi tơlĕch noh GDP hơtŏk đơ̆ng 6 - 6,5%. Phŏ Kơdră Anih jang Mŭk drăm kơ Kuôk hô̆i Nguyễn Minh Sơn tơblang: “Ưh đei hơmet tơchơ̆t găh hơtŏk tơ iung. Tơdrong tơm kơyuơ oei tơguăt hăm Tơchơ̆t 124 đơ̆ng Kuôk hô̆i vă pơm jang drơ̆ng minh dôm xơnong jang, trong jang mă Kuôk hô̆i jăl 14 hlôi pơjao ăn Jơnŭm pơgơ̆r teh đak. Khei năr noh Kuôk hô̆i xơkơ̆t tôm tơdrong păng băt adrol dôm tơdrong răm đơ̆ng pơrang jĭ Covid-19 pơrăm truh mŭk drăm păng duh tơlĕch vă adrin kơ ‘nôh lơ̆m khei năr truh vă đei jơnei tơchơ̆t hlôi tơlĕch”.

          Vă vei xơđơ̆ng keh kong ăn 'măng hop akŏm mă Mônh, rim anih jang kơ Kuôk hô̆i, Jơnŭm pơgơ̆r teh đak, dôm anih jang tư phap hlôi jang hadoi đei jơnei drơ̆ng nơ̆r kơjung hăm dôm tơdrong chih akŏm pơtruh ăn Kuôk hô̆i. Lơ̆m khei năr pơrang jĭ Covid-19 hơbuh hli, Kuôk hô̆i hlôi tơroi hăm Anih tơm Chĭnh trĭ păng hop akŏm tơ̆ lăm hŏk hôp Diên Hồng hăm pơkăp mong răk jơ 'năr păng đei iŏk jơnei hloh, xơđơ̆ng hloh. Tơdrong hop akŏm hlôi pơ kơđeh đei 5 năr pơtêng hăm pơkăp, bơ̆ jang hloi hăm dôm 'năr pơdăh pơdeo. Rim bơngai tang măt ăn Kuôk hô̆i đơ̆ng 19 tơring đei hơbuh pơrang jĭ hlôi đei xơng kiơ̆ pơkăp adrô̆, oei tơ̆ hnam tơmoi adrô̆ păng tơ oei hŏk hôp tơ̆ lăm adrô̆ tơ̆ Diên Hồng. Ƀok Tổng thư kĭ, Kơdră Anih jang Kuôk hô̆i Bùi Văn Cường ăn tơbăt dơ̆ng: “Găh tơchơ̆t, bơngai đơ̆ng dôm tơring pơm kiơ̆ pơkăp oei tơklăh lơ̆m tơpôl kiơ̆ Tơchơ̆t 16 ăh vih truh Hà Nội, mưh kon pơlei hmă noh athei pơm kiơ̆ pơkăp oei tơklăh, mă lei Thủ tướng teh đak hlôi tơchơ̆t hăm dôm bơngai tang măt ăn Kuôk hô̆i hlôi hơlen pham 3 'măng pơkăp âm tĭnh, hlôi đei ƀet vaccine noh gơh vih akŏm hŏk hôp. Mă lei duh athei pơm kiơ̆ kơjăp dôm tơdrong tơchơ̆t tang găn păng tơjră pơrang jĭ Covid-19. Dang ei nhôn đei trong hơmŏ, mưh ƀôh đei bơngai tang măt yơ mă hơbuh jĭ lơ̆m anih hŏk hôp noh athei pơkăp oei tơklăh, mă lei duh oei vang hop akŏm păng tăh kơphĭu nhen hmă đĕch”.

          Kon pơlei tăh hla jâ̆p teh đak tŏk bŏk oei hơlen păng lui ngeh, 'Măng hop akŏm mă mônh, Kuôk hô̆i jăl 15 đei pơgơ̆r xơđơ̆ng, jơnei keh kong. 'Nâu jing 'măng hop akŏm kăp gĭt, mưh jang tơnăp păng 'lơ̆ng gô tơgop hơtŏk mŭk drăm – tơpôl kơ teh đak, mă hăt noh pơm kiơ̆ "tơchơ̆t jang hadoi", hơtŏk răh mŭk drăm, tơjră răh pơrang Covid-19 gơh đei jơnei.

Lan chih păng pơre nơ̆r