VOV4.Bahnar - Vă tơ gŭm hŏk tro păng bơ ngai ŭnh hnam hŏk tro lơ̆m ‘măng pơ long lĕch ‘măng khoă hŏk đĭ jăl 3 sơ năm 2021, ‘măng tơ lĕch jang Tơ drong jang tơ gŭm pơ yan pơ long sơ năm ‘nâu gô pơ gơ̆r đơ̆ng ‘năr 6/7 truh ‘năr 9/7 truh. ‘Nâu jĭ kơ tơ̆ng ang tơ̆ jơ hop akŏm tơ roi tơ băt hăm khŭl chih kơ tơ̆ng ang yua Trung ương Khŭl sinh viên Việt Nam, Anih tơm vei lăng găh pơ tho pơ hrăm, grŭp jang Thiên Long pơ gơ̆r ‘năr 27/5. Tơ drong jang “Tơ gŭm pơ yan pơ long” đei pơ gơ̆r tơ̆ đĭ đăng rim hơ nih pơ long kơ ‘măng pơ long lĕch ‘măng khoă hŏk đĭ jăl 3 sơ năm 2021, tơ̆ 63 dêh char, pơ lei tơm. Kiơ̆ ‘noh, Anih pơ gơ̆r tơ drong jang gô akŏm lơ̆m tơ drong tŭn pran tơ roi tơ băt, roi tơ ƀôh dôm kênh pơ hrăm ming ƀai hŏk trực tuyến tăh lơ̆m rim video pơ hrăm ming, pơ hrăm pơ long lĕch ‘măng khoă đĭ jăl 3 lơ̆m rim kênh kơ tơ̆ng ang. Hơ dai hăm ‘noh, tơ lĕch jang rim tơ drong jang jang tơ gŭm trực tuyến kiơ̆  cổng thông tin trực tuyến, tơ klep đơ̆ng bơ ngai jang tơ gŭm păng rim hŏk tro kăl kơ tơ gŭm, pơ jing trong jang tơ gŭm hăm hŏk tro đei tơ drong arih sa mơ mat tat tơ̆ tơ ring hơ tăih hơ tŏ, tơ ring sơ lam, achon đak dơ sĭ, tơ ring mơ mat tat dêh hloh.

Thuem: Tơ blơ̆