VOV4.Bahnar - Tây Nguyên tŏk bŏk lơ̆m pơyan phĕ chehphe. Rim hnam kmăi sơ̆k hơdrĕng chehphe găh lơ lơ̆m pơlei pơm ăn tơdrong erĭh sa kơ lơ ŭnh hnam ư̆h kơ hiôk kơ yuơ ‘nhui, ƀruih ƀrăm păng re gơ gring. Tơdrong mă au đei gei hơnơ̆ng lơ̆m lơ sơnăm kơ au, hơnĭh bơ̆ jang jei hlôi năm xek phak mĭnh ƀar hơnĭh, mă lei mư̆h trŭh pơyan ‘nŏh đei dơ̆ng. Bơngai chă chĭh kơtơ̆ng ang kơ Radiô NPMVN oei tơ̆ Tây Nguyên chĭh tơbăt tơdrong au.

Mĭnh hnam kmăi sơ̆k hơdrĕng chehphe tơ̆ apŭng Cư Mgar, dêh char Dak Lăk

Rim ‘măng trŭh pơyan phĕ chehphe, tơdrong erĭh sa kơ ŭnh hnam ƀok Trần Trọng Minh, oei tơ̆ tơring Hoà Khánh, pơlei tơm Buôn Ma Thuột, dêh char Dak Lăk păng lơ ŭnh hnam tăp dăr măh mơ hoal mư̆h hơnĭh kmăi sơ̆k hơdrĕng chephe tơ jê̆ hnam hơnơ̆ng chă sơ̆k hơdrĕng pơm ăn ‘nhui, ƀruih ƀrăm păng hrơ̆ng hreng. Ƀok Minh tơbăt, hơnĭh au đei jang lơ̆m 8 sơnăm kơ au. Rim ‘măng chă sơ̆k hơdrĕng chehphe ‘nŏh ‘nhui kơ ôl kơ al păr jơp lơ̆m koeng. Lơ ‘măng kon pơlei năm tơroi tơbăt hăm hơnĭh bơ̆ jang kơpal mă lei oei tim mă xek tơlang keh đang ‘mơ̆i.“Kơtĕch mĭnh khei au, hơnĭh kmăi sơ̆k hơdrĕng chehphe hơnơ̆ng chă sơ̆k hơdrĕng prăt măng prăt năr, ư̆h kơ đei pơdơ̆h hloi pơm ăn ‘nhui păng ƀrŭih ƀrăm lơ̆m pơlei. Tơ̆ gơmăng ăn kmăi kơdau prăt măng hrơ̆ng hreng dêh”.

‘Nhui ‘mui păng hrơ̆ng hreng đơ̆ng hơnĭh kmăi sơ̆k hơdrĕng chehphe pơm kơnê̆ trŭh tơdrong erĭh sa kơ kon pơlei

Jei đei ƀơm kơnê̆ đơ̆ng hơnĭh kmăi sơ̆k hơdrĕng chehphe lơ̆m pơlei, ‘nhŏng Trần Văn Thương, oei tơ̆ Koeng kơphô̆ Toàn Thắng, thĭ trân Ea Pôch, apŭng Cư M’gar, tơbăt: Tơdrong răm đơ̆ng ‘nhui unh, ‘mui, re gơ gleng hlôi pơm ăn ŭnh hnam sŏng sa pă lŭ, tep pă nĭt; hơ iŏh hơ nơ̆ng hiĕn, nhơ̆m.“Tơ̆ au công ty Hồng Tự sơ̆k hơdrĕng chehphe pơm ăn ‘nhui kơ ôl pơm kơnê̆ trŭh tơdrong erĭh sa kơ kon pơlei tôch kơtang. Tơ̆ gơmăng đe hơ iŏh, bơngai ‘lŏ tep dui jơhngơ̆m ư̆h kơ hiôk. Sơnăm sơ̆ jei pơm hla bơar athei kơdră chĕp pơgơ̆r tơring sek tơlang, khul kơdră tơring jei hlôi xek tơlang ư̆h kơ ăn jang, mă lei đơ̆ng rŏng ‘nŏh trŭh dang ei Kŏng ty hơnơ̆ng jang dơ̆ng”.

        Dak Lăk ‘nŏh hơgăt tĕh chehphe să hlŏh lơ̆m tĕh đak, hơnĭh hnam kmăi sơ̆k hơdreng chehphe bơ̆ jang chă sơ̆k hơdreng lơ̆m mĭnh pơyan trŭh rơbau hơnĭh. Tơ̆ apŭng Cư Mgar, mĭnh lơ̆m dôm tơring pơtăm chehphe să hlŏh kơ dêh char, chĭh jô̆ tim mă tôm hlôi đei 130 hơnĭh hnam kmăi sơ̆k hơdrĕng chehphe, jei pơjing lơ̆m pơlei ngăl. Ƀok Nguyễn Công Văn, Kơ iĕng Kơdră Dơnŏ aniưh vei lăng kon pơlei apŭng Cư Mgar tơbăt, rim hnam kmăi sơ̆k hơdrĕng chehphe tơ̆ au hơnơ̆ng chă sơ̆k hơdrĕng hơnơ̆ng lơ̆m 2 khei. Hlŏh đơ̆ng năr lăng, rim tơngla hnam kmăi sơ̆k hơdrĕng chehphe tim mă tơmơ̆t jên jang ƀlep vă pơm dă ƀiơ̆ ‘mê̆ ‘mach cham char.“Apŭng tim mă pơ prŏ đei hơnĭh pơm tơlĕch tĕch mơdro tơmam drăm chŏh jang sa vă rim ŭnh hnam gơ̆h chă răt vă pơm hnam kmăi sơ̆k hơdrĕng chehphe tơ̆ nŏh trŏ ƀlep hăm tơdrong tơchơ̆t kơ khôi luơ̆t. mă lei lơ̆m tơdrong chă pơrô̆ pơrôp, athei pơkăp ‘nŏh hlŏh 90% rim ŭnh hnam jei tơplĭh tơdrong joăt. ‘Nŏh sơ̆ đe hăp sơ̆k hơdrĕng hăm kơđŏh chehphe, hăm kam ƀa vă dă ƀiơ̆ tơhoach kon jên lơ, găh dang ei đe hăp iŏk yua ‘long ŭnh vă rŭk sơ̆k, đơ̆ng nŏh pơm ‘long tơlŭh kơ jung kơna dă ƀiơ̆ kơ ‘nhui. Mă lei ư̆h khan ŭnh hnam ayơ tơplĭh tơdrong joăt ngăl ôh”.

Đei ƀơm trŭh hnam kmăi sơ̆k hơdrĕng chehphe pơm ăn ‘nhu, ƀruih ƀrăm kơtang tơ̆ pơlei, Dơnŏ anĭh vei lăng kon pơlei apŭng Krông Pach, dêh char Dak lăk hlôi xek phak Kong ty Phúc Hạnh, tơring Ea Kênh, hăm kon jên 1 trĭu 500.000 hlak jên. Hơnĭh bơ̆ jang hlôi tơlĕch tơdrong pơkăp, tơdăh ư̆h hơmet pơ ‘lơ̆ng tơdrong pơm ăn ‘nhui, ‘mui lei Kŏng ty kăl tơ iung pơjing hnam kmăi sơ̆k hơdrĕng chehphe tơ̆ hơnĭh anai, dăh mă pơdơ̆h jang hloi.

        Jei lei lăi, tơ̆ Dak Nông, khei năr au, rim hơnih kmăi sơ̆k hơdrĕng chehphe kơ ŭnh hnam, hơnĭh răt iŏk tơmam drăm chŏh jang sa bơ̆ jang. Rim hơnĭh sơ̆k hơdrĕng au jei pơjing lơ̆m pơlei, kơna pơm kơnê̆ kơtang trŭh tơdrong erĭh sa kơ kon pơlei, pơm ‘mê̆ ‘mach cham char kơ yuơ ‘nhui păng ‘mui.

Tơ̆ tơring Thuận An, apŭng Dak Mil, lơ hơnĭh sơ̆k hơdrĕng chehphe chă sơ̆ng hơdrĕng hơnơ̆ng, pơm ăn ‘nhui kơ ŭl kơ al jơ̆p lơ̆m pơlei, pơm kơnê̆ trŭh cham char. ‘Nhui, ‘mui oei păr trŭh tơ̆ trong glung 14, pơm kơnê̆ trŭh tơdrong gre chă kơ dau. Kŏng ang apŭng Dak Mil hlôi năm dăr lăng, ƀô̆h hơnĭh răt tơmam drăm chŏh jang sa Lợi Hoa tơ̆ tơring Đak Lao đei 2 hơnĭh kmăi sơ̆k hơdrĕng chehphe hơdrĭh, pơm ăn ‘nhui tôch kơtang. Kiơ̆ đơ̆ng hơnĭh bơ̆ jang vei lăng găh au athei, Dơnŏ anĭh vei lăng kon pơlei dêh char Dak Nông hlôi kĭ xek phak hơnĭh răt tơmam drăm Lợi Hoa 52 trĭu hlak jên.

Kiơ̆ đơ̆ng Dơnŏ anĭh vei lăng Bri brăh păng cham char apung Dak Mil chĭh jô̆, lơ̆m apŭng đei 350 hơnĭh sơ̆k hơdrĕng chehphe, akŏm lơ tơ̆ rim tơring Dak Săk, Thuận An, Đắk Lao, Đức Minh.

Hrei au chehphe Dak Lăk păng Dak Nông tŏk bŏk phĕ kơtang, jei jing khei ‘năr hơnĭh sơ̆k hơdrĕng chehphe iung jang kơtang. Kon pơlei tơring tŏk bŏk gôchang hơnĭh bơ̆ jang dêh char atŏk kơtang dăr lăng, xek phak rim hơnĭh sơ̆k hơdrĕng chehphe pơm ăn ‘nhui păng ‘mui, hrơ̆ng hreng, hrôih đei tơdrong tơchơ̆t ƀlep, xek tơlang keh đang tơdrong ‘mê̆ ‘mach cham char đơ̆ng rim hơnĭh au pơm ăn.

Kiơ̆ đơ̆ng Dơnŏ anĭh vei lăng Bri brăh păng Cham char dêh char Dak Nông, tơdrong xek tơlang rim hơnĭh sơ̆k hơdrĕcng chehphe pơm glăi găh lơ̆m Dơnŏ anĭh vei lăng kon pơlei rim apŭng gơ̆h xek tơlang. Dơnŏ anĭh au hơnơ̆ng chĭh pơtrŭh hla bơar athei Dơnŏ anĭh vei lăng kon pơlei rim apŭng dăr lăng, athei kon pơlei ‘nĕ pơm ăn ‘mê̆ ‘mach cham char yuơ đơ̆ng ‘nhui, ‘mui lơ̆m tơring. Rim hơnĭh sơ̆k hơdrĕng chehphe găh lơ kơ yuơ rim ŭnh hnam păng rim hơnĭh răt tơmam drăm pơm tơlĕch kơ dĭh, mă đơ̆ng hơnơ̆ng chă pơtho khan mă lei kon pơlei oei hơnơ̆ng pơm glăi đĕch.

Bai chĭh đơ̆ng VOV Tây Nguyên

Bơngai tơblơ̆: Amazưt