VOV4.Bahnar - ‘Mi hơnơ̆ng lơ̆m dôm năr au ki hlôi pơm ăn tĕh hơlĭh, tơdrŭt mĭnh ƀar jăl trong gre păng đak lơ̆p mĭnh ƀar tơring tơ̆ Dak Nông. Mă hơdăh, tơ̆ apŭng Krông Nô, jăl trong glung 4B, trong yak hlŏh tơring Quảng Phú hơnơ̆ng đei ƀô̆h lơ hơnĭh tĕh tơdrŭt tơ̆ jĭh trong, pơm hơmơt ư̆h sơđơ̆ng trong nơnăm.

Trong glung 28, jăl trong găn hlŏh thôn Phú Thuận, tơring Quảng Phú đak lơ̆p kơtang. Đak tŏk kơtang pơm lơ̆p gơng thoong đak Đak Sôr, tơring Nam Xuân. Tơ̆ apŭng Dak Glong, tơ̆ jăl trong đơ̆ng tơring Dak Som năm tơ̆ tơring Dak Rmăng, jăl trong găn hlŏh pơlei B’Dơng, tơring Dak Som, tĕh hơlĭh kơjung 60m. Tơdrong tĕh tơdrŭt hơlĭh oei hơnơ̆ng pơm kơnê̆ kơtang. Tơ̆ dôm tĕh hơlĭh, rim tơring kơ Dak Nông hlôi hơtơ̆p kơƀang tơbăt hli hlơt, ăn khŭl jang gak vei lăng, pơtho tơbăt ăn kon pơlei, gre ăn trong au sơđơ̆ng.Khŭl bơ̆ jang iung jang dăr lăng dôm tơring hơmơt  đei đak lơ̆p, đak lŏk jrŏh,tĕh tơdrŭt hơlĭh, hơmet ‘lơ̆ng bơngai jang gre ăn yông kon pơlei năm oei tơ̆ hơnĭh sơđơ̆ng.

Tơblơ̆ nơ̆r: Amazưt