VOV4.Bahnar - ‘Mi tĭh đunh năr lơ̆m dôm năr au ki pơm ăn lơ tơring lơ̆m dêh char Lâm Đồng đak lơ̆p jrŭ. Tơ̆ tơring Hiệp An, apŭng Đức Trọng, ‘mi tĭh đunh năr, đak đơ̆ng găh tu jrŏh kơtang pơm ăn rim thôn Định An, K’Rèn, K’Long păng Tân An đak lơ̆p kơtang. Kơ yuơ đak lơ̆p jrŭ đơ̆ng 1 trŭh 1,5met kơna lơ mir chŭn kon pơlei lơ̆m tơring đak lơ̆p kơtang.

'Mi tĭh đak đơ̆ng găh tu jrŭh pơm ăn tơring Hiệp An apŭng Đức Trọng đak lơ̆p kơtang

Ư̆h khan lăp hơdrô̆ tơring Hiệp An, ‘mi tĭh đunh năr jei pơm ăn đak tơ̆ đak kroong Cam Ly tŏk tĭh păng lơ̆p hloi tơring Hiệp Thạnh, apŭng Đức Trọng păng mĭnh ƀar tơring apŭng Lâm Hà. Tơ̆ hơnăp tơdrong au, Hơnĭh bơ̆ jang ăn Dơnŏ anĭh chĕp pơgơ̆r Trung ương găh tang găn tŏ ‘mi kial pơrăm hlôi đei nơ̆r tơbăt ăn Dơnŏ anĭh chĕp pơgơ̆r tang găn tŏ ‘mi kial păng tơchă dŏng dêh char Lâm Đồng găh tơ jră tang găn hăm đak hơbông kơtang tơ̆ pơbăh đak kroong Cam Ly; tơlĕch jang yông kon pơlei lĕch vĕh đơ̆ng rim tơring đak lơ̆p jrŭ, hơmơt tơt năm oei tơ̆ hơnĭh sơđơ̆ng.

Tơblơ̆ nơ̆r: Amazưt