VOV4.Bahnar - Lơ̆m dôm năr âu ki, lơ̆m dêh char Dak Lak hlôi đei ƀôh ‘mi tih pơm ăn đak lơ̆p, pơm hiong răm tơ̆ dôm apŭng M’Đrắk, Ea Kar, Krông Bông, Krông Năng. Kiơ̆ chih jô̆ tam mă tôm, ‘măng ‘mi âu hlôi pơm ăn kơ hrĕng hek tar ‘long pơ tăm, dơ nâu rong ka hơ dang đei hiong răm, lơ trong nơ năm tơ̆ dôm apŭng M’Đrắk, Krông Bông, Krông Năng hư răm kơ tang.

Tơ roi tơ băt krê hơ mơt tơ̆ trong đei đak lơ̆p tơ̆ apŭng Ea Kar, dêh char Dak Lak

Hơ drô̆ apŭng M’Đrắk ‘mi tih pơm ăn 1 ‘nu lôch, 1 ‘nu hiong dong. Dang ei khŭl kơ dră rim tơ ring tŏk bŏk akŏm khŭl linh hơ met pơ ‘lơ̆ng hiong răm đơ̆ng ‘mi kial. Tơ dra hơ drol tŏ ‘mi kial oei đei ƀôh krê hơ mơt, ưh kơ ê yua thoi noh Anih vei lăng kon pơ lei dêh char Dak Lak athei rim tơ ring păng kon pơ lei lơ̆m dêh char hơ nơ̆ng kơ chăng tơ lĕch lơ trong jang tơ jră, tơ jur ƀiơ̆ hiong răm yua đơ̆ng ‘mi kial pơm ăn.

Thuem: Tơ blơ̆