VOV4.Bahnar - Kơsơ̆ năr 4/10, tơ̆ Hà Nội hlôi pơgơ̆r pơm lê̆h sơng iŏk 1 trĭu 500.000 kơliêu vaccine Pfizer kơ yuơ Mi pôk ăn Việt Nam ‘moi kiơ̆ trong jang COVAX. Hăm tơgŭm djru au, Mi sơkơ̆t hơdăh nơ̆r pơkăp hơnơ̆ng tơgŭm Việt Nam pơrăm kĕ jĭ hơbŭh Covid-19, tơgŭm pơm sơđơ̆ng tơdrong erĭh sa ‘lơ̆ng hơ iă păng jơhngơ̆m pran jăng grăng akau ăn kon pơlei. Tơ̆ jơ pơm lê̆h pơjao vaccine, Kơ iĕng Kơdră jang tơbôl Đặng Hoàng Giang pơma tơbăt jơhngơ̆m đon bơnê kơ Khŭl kơdră Mi găh tơdrong tơgŭm ăn Việt Nam ‘moi kiơ̆ trong jang COVAX. Lơ̆m khei ‘năr jĭ hơbŭh pơrăm kơtang lơ̆m plei tĕh păng tơ̆ Việt Nam, tơdrong tơgŭm au tôch gĭt kăl, tơgŭm ăn Việt Nam roi năr đei joăt hăm tơdrong oei sa hiôk hian hle; adoi pơma tơbăt jơhngơ̆m đon ‘mĕh vă gô hơnơ̆ng sơng iŏk đei tơdrong tơgŭm djru đơ̆ng rim pang jang hơdoi, ư̆h khan lăp hơdrô̆ găh vaccine mă lei trŭh hloi tơgŭm djru jang pơgang, tơbăt dĭh băl trong jang ‘lơ̆ng găh hơmet ming pơ ‘lơ̆ng jang mŭk drăm păng tang găn jĭ hơbŭh, đơ̆ng nŏh tơgop lơ̆m tơdrong oei sa sơđơ̆ng ‘lơ̆ng hơ iă atŭm kơ apŭng plĕnh tĕh.

Tơblơ̆ nơ̆r: Amazưt