VOV4.Bahnar - Jơ hop akŏm tơ ƀơ̆p muh măt 43 sơ năm năr jơ nei tơ blăh tơ ring pơ mơ̆t pơ băh păng kŭm hăm linh kon pơ lei Campuchia jơ nei khŭl pơ lôch rŭng tơ̆ Campuchia (7/1) hlôi pơ gơ̆r ‘năr brei ‘năr (7/1) lơ̆m jơ năr hơ iă tơ drong tơ bôl, hăm tơ drong đei măt đơ̆ng rim kang ƀô̆ so, linh iung jang tơ gŭm Việt Nam tơ gŭm buăl Campuchia, rim sinh viên Campuchia tŏk bŏk hŏk pơ hrăm tơ̆ pơ lei tơm. Tơ drong kăl yua đơ̆ng Jơ nŭm rim anih jang tơ bôl pơ lei tơm Hồ Chí Minh pơ gơ̆r. Pơ ma tơ̆ jơ hop akŏm tơ ƀơ̆p muh măt, Kơ dră vei lăng anih tang măt teh đak Campuchia tơ̆ pơ lei tơm Hồ Chí Minh Sok Dareth pơ ma hơ dăh: Đảng, teh đak, kon pơ lei păng linh iung jang tơ gŭm Việt Nam hlôi tơ gŭm păng plang hŭt rim tơ drong vă jang kiơ̆ tơ drong jang apŭng plĕnh teh, tơ gŭm kon pơ lei Campuchia klăih đơ̆ng khŭl pơ lôch rŭng lơ̆m ‘năr 7/1/1979 păng hơ nơ̆ng pơ vei tơ drong đei măt tơ̆ Campuchia vă tơ gŭm tang găn tơ drong pơm hơ lơ̆k dơ̆ng đơ̆ng khŭl pơ lôch rŭng, kŭm nhen tơ drong tơ gŭm rim tơ drong lơ̆m tơ drong pơ jing ming dơ̆ng Campuchia. Kon pơ lei Campuchia ling lang ƀlŏk hơ dơ̆r tơ drong jang gĭt kăl âu, ling ling lang chih răk akhan ‘năr  7/1 ‘noh jĭ năr arih dơ̆ng ‘măng mă 2. ‘Nâu jĭ tơ drong đei tơ pă đơ̆ng jơ hnơr arih mă ưh kơ đei bu gơh tơ roi kư̆ kă dăh mă pơm hiơt hê̆.

Thuem: Tơ blơ̆