VOV4.Bahnar - Tơ̆ apŭng Ea Kar păng plei tơm Buôn Ma Thuột, dêh char Đăk Lăk ‘nao pơgơ̆r ‘Năr akŏm plang Kơtoh pham brê  Tây Nguyên xơnăm 2021. Kơ rơbâu kon pơlei jang kiơ̆ tơnăp dôm tơchơ̆t tang găn păng tơjră pơrang, pơtăng trong kơjung vă gô plang pham.

‘Năr akŏm plang Kơtoh pham brê Tây Nguyên xơnăm 2021 jing tơdrong jang pơm kiơ̆ pơkăp Rim kơtoh pham brê – he 2021 păng tơdrong jang Hơyak brê ‘măng mă 8 yuơ Jơnŭm pơgơ̆r jang kơ teh đak hơvơn plang phâm ‘mêm kơ eng tơlĕch. Hăm pơkăp “Rim kơtoh pham axong ăn – minh tơdrong erih đei dŏng”, mă lơ̆m khei năr pơrang jĭ hơbuh hli tơ̆ lơ tơring, kon pơlei Đăk Lăk duh oei hăt hot vang năm akŏm plang pham. Rim bơngai pơm kiơ̆ tơnăp pơkăp 5K đơ̆ng Anih tơm Y tê̆, dơ̆ng pơkăp kiơ̆ trong kơjung gô truh tur năm chih măt. ‘Nhŏng Trương Văn Lợi, jang tơ̆ Anih Haih kuan dêh char Đăk Lăk ăn tơbăt: “Pơm kiơ̆ nơ̆r hơvơn đơ̆ng Ƀan châ̆p hanh kŏng đoan noh kơdih inh duh vang năm akŏm plang pham atŭm hăm jâ̆p teh đak vă tơpuh lê̆ pơrang jĭ Covid-19. Vang năm plang pham noh duh kơdih tang găn păng tơjră pơrang kiơ̆ pơkăp 5K. Kiơ̆ rim ‘măng  plang  pham noh inh duh ‘meh vă tơgop dôm kơtoh pham ‘măn răk tơgŭm ăn dôm bơngai ưh đei pŭn ai”.

Lơ̆m ‘măng plang pham âu ưh adrô̆ đei kon pơlei lơ̆m plei tơm Buôn Ma Thuột mă oei đei lơ bơngai đơ̆ng dôm apŭng tơjê̆ vang akŏm. Pơmai Nguyễn Thị Hương, pơtho tơ̆ hnam trưng THPT Quang Trung, apŭng Krông Pach, dêh char Đăk Lăk đei măt đơ̆ng hrôih tơroi:  “Rim xơnăm inh vang akŏm dôm tơdrong hơvơn plang pham ‘mêm kơ eng đơ̆ng dôm jăl jang, noh rim xơnăm inh plang pham đơ̆ng 2 truh 3 ‘măng kiơ̆  tơchơ̆t  jơhngơ̆m jăn grăng dăh mă ưh. ‘Năr âu vang plang pham ‘mêm kơ eng noh đei kŏng đoan hnam trưng tơbăt găh tơdrong tang găn păng tơjră pơrang jĭ păng kơdih po inh duh nhen dôm kŏng  đoan viên kơ hnam trưng vang chă tang găn pơrang tơnăp, vei xơđơ̆ng kiơ̆ xơkơ̆t 5K kiơ̆ pơtho đơ̆ng Anih tơm Y tê̆”.

Kiơ̆ kơ ƀok Nguyễn Đức Phú, Kơdră Anih pơm jang kơ Jơnŭm pơgơ̆r Plang pham ‘mêm kơ eng dêh char Đăk Lăk, vă pơm trŏ tơdrong kăl pham ‘măn hơmet jĭ lơ̆m khei năr tang găn păng tơjră pơrang jĭ Covid-19, đơ̆ng blŭng xơnăm truh dang ei dêh char Đăk Lăk hlôi pơgơ̆r lơ ‘măng plang pham ‘mêm kơ eng, hơvơn đei lơ kon pơlei vang akŏm. Găh tơdrong jang Hơyak brê păng Tơdrong jang Dôm Kơtoh pham brê  - he xơnăm âu đei pơgơ̆r hrôih hloh 1 khei pơtêng hăm rim xơnăm, vă tơgŭm tơtom kơsô̆ pham pơtruh ăn Hơlen vei axong pham trung ương: “Dôm ‘măng plang pham lơ̆m ‘măng âu noh ‘nguaih kơ ‘măng dŏng hơmet jĭ lơ̆m dêh char noh oei tơgŭm ăn Anih jang Hơlen vei axong pham trung ương jing anih jang găh tơring tu. Dang ei yuơ pơrang jĭ hơbuh hli tơ̆ tơring noh, đe xư ưh gơh iŏk pham noh Jơnŭm pơgơ̆r jang duh iŏk pham vă pơtruh ăn Anih jang Hơlen vei axong pham trung ương”.

‘Năr  akŏm plang Kơtoh pham brê Tây Nguyên xơnăm âu gô đei pơgơ̆r tơ̆ 6 anih tơ̆ dêh char Đăk Lăk, kơchĕng gô xơng đei tŏ xĕt jat noh 2.900 tơpu pham. Adrô̆ lơ̆m năr 8/6 âu ki, tơdrong akŏm hlôi xơng đei hloh 1.000 tơpu pham. Lơ̆m noh, ăh năr 6/6, ‘Năr akŏm plang pham hlôi đei pơgơ̆r tơ̆ apŭng Ea Kar păng iŏk đei hloh 1.200 tơpu pham păng hlôi pơtruh 500 tơpu pham vă tơgŭm ăn Anih jang Hơlen vei axong pham trung ương.

Lan chih păng pơre nơ̆r