VOV4.Bahnar - Năr au, năr 20/7, pơgơ̆r blŭng a ‘măng hop akom mă Blŭng-Kuô̆k hô̆i jăl XV. Hơdrol kơ ‘nŏh, tơ̆ Hnam Kuô̆k hô̆i hlôi pơgơ̆r hop akŏm ƀar păh Đảng khŭl Kuô̆k hô̆i hăm Khŭl kơdră chĕp pơgơ̆r Đảng kơ Khŭl kơdră chĕp pơgơ̆r Tĕh đak. Hơlen găh bơ̆ jang hơmet ăn ‘măng hop akŏm mă bŭng, Kơdră chĕp pơgơ̆r Kuô̆k hô̆i Vương Đình Huệ akhan, rim hơnĭh bơ̆ jang kơ Kuô̆k hô̆i, Dơnŏ anĭh chĕp pơgơ̆r Kuô̆k hô̆i păng Khŭl kơdră chĕp pơgơ̆r Tĕh đak, rim hơnĭh bơ̆ jang, rim hơnĭh jang tư pháp hlôi iung jang hơdoi kơ jăp, iŏk đei jơnei kơtang drơ̆ng mĭnh nơ̆r hăm rim trong tơlĕch jang pơtrŭh ăn Kuô̆k hô̆i. Lơ̆m khei ‘năr đei jĭ hơbŭh Covid-19 pơrăm kơtang, Đảng khŭl Kuô̆k hô̆i hlôi bơ̆ jang hăm rim hơnĭh ƀơm trŭh, tơbăt ăn Dơnŏ anĭh tơm Chĭnh trĭ păng gô pơgơ̆r hop akŏm hloi lơ̆m hơnĭh hop akŏm Diên Hồng hăm trong pơkom jơ ‘năr păng jơnei hlŏh, sơđơ̆ng hlŏh, tơdrong pơgơ̆r ‘Măng hop akŏm gô kơ đĕh năr, tơchĕng hơlau đei pơgơ̆r pơtôch hop akŏm lơ̆m năr 31/7, pơgơ̆r hop akŏm hloi lơ̆m năr pơdơ̆h jang. Găh trong vei lăng sơđơ̆ng ăn hop akŏm, Kơdră chĕp pơgơ̆r Kuô̆k hô̆i Vương Đình Huệ pơma hơdăh, Dơnŏ anĭh bơ̆ jang Khŭl kơdră chĕp pơgơ̆r Tĕh đak, Dơnŏ anĭh tơm jang pơgang hlôi iung jang đơ̆ng hrôih vă hơmet ăn ‘măng hop akŏm mă blŭng, Kuôk hô̆i jăl XV. Kiơ̆ trong sơđơ̆ng ‘lơ̆ng hơ iă, dĭng trŭh dang ei đĭ đăng rim Kơdră tang măt Kuôk hô̆i păng bơngai jang tơgum kơ Dơnŏ anĭh bơ̆ jang ăn Kuô̆k hô̆i hlôi đei ƀet bơ̆ng, khăm hơlen pham.

Tơblơ̆ nơ̆r: Amazưt