VOV4.Bahnar - Kơsơ̆ năr 17/11, Năr lêh tơgoăt tơgoăl hơdrĕch hơdrung jei đei pơgơ̆r tơ̆ pơlei Đak Dơn, tơring Măng Ri, apŭng Tu Mrông, dêh char Kon Tum. Pơlei Đak Dơn đei 100 ŭnh hnam, hăm vă jê̆ 350 ‘nu bơngai Xdang ngăl.

Năr lêh Tơgoăt tơgoăl hơdrĕch hơdrung pơlei Đak Dơn, tơring Măng Ri

Dôm sơnăm tơ jê̆ au trong hnam hlôi đei ming man ‘lơ̆ng, tơdrong erĭh sa kơ kon pơlei hlôi tơplĭh hơ iă ƀiơ̆, gơnơm pơtăm rim kơ loăi ‘long đei iŏk yua kơ jăp, nhen sâm Ngọc Linh, hồng đẳng sâm, chehphe tơring tơngiĕt ... Lơ̆m năr lêh Tơgoăt tơgoăl hơdrĕch hơdrung, kon pơlei lơ̆m pơlei Đak Dơn jei pơgơ̆r tôn chĭng chêng, chă asoang, tơ ƀô̆h tơbăt tơdrong pai por ‘nhot sa joăt joe; pơkăp hơdrin 100% ŭnh hnam iŏk đei ŭnh hnam erĭh sa ‘lơ̆ng; jang kiơ̆ trong jang hơdoi pơtăm sâm Ngọc Linh hăm hơnĭh mơdro sa; hơdrin vang jang tơ iung pơjing tơring tơrang ‘nao, pơm kiơ̆ kơ jăp tơdrong pơkăp pơlei păng khôi luơ̆t tĕh đak. Vang năm pơm lêh au atŭm hăm kon pơlei kơ pơlei Đak Dơn, ƀok Dương Văn Trang, Bí thư Đảng dêh char, Kơdră chĕp pơgơ̆r Jơnŭm vei lăng kon pơlei dêh char Kon Tum hôn bơnê dôm tơdrong hơdrin đơ̆ng kon pơlei lơ̆m atŏk tơ iung mŭk drăm, tơpôl, adoi pơchŏh trong vă iung jang kơtang hlŏh dơ̆ng dôm tơdrong đei kơ tơring pơtăm sâm Ngọc Linh.

Tơblơ̆ nơ̆r: Amazưt