VOV4.Bahnar - Năr ‘nâu, 15/12 pơ gơ̆r Hop akŏm tơ lĕch trong tĕch tơ mam tơ̆ tĕh đak đe đơ̆ng Việt Nam 2021 hăm hơ năn: “Tơ lĕch trong tĕch tơ̆ tĕh đak đe vang tơ gop tưk tơ iung păng jang tŏk mŭk drăm”. Hop akŏm đei 2 jơ pơ ma nuh tơm, hăm dôm tơ drong: tơ drong ‘lơ̆ng păng tơ drong nol tơ̆ 1,2 anih tĕch mơ dro tơ̆ tĕh đak đe đơ̆ng rŏng kơ jĭ Covid-19; Trong jang vă tĕch mơ dro tơ̆ tĕh đak đe tơ gop tưk tơ iung păng jang tŏk mŭk drăm. Kơ dră tơm vei lăng jang kơ măy, tĕch mơ dro Nguyễn Hồng Diên pơ gơ̆r hop akŏm.

Hop akŏm tơ lĕch trong tĕch mơ dro tơ̆ tĕh đak đe kơ Việt Nam ‘nŏh jĭ tơ drong jang rim sơ năm yoa đơ̆ng Anih tơm vei lăng jang kơ măy, tĕch mơ dro pơ gơ̆r, jang hơ doi hăm dôm anih jang kơ pal đei ƀơm truh pơ gơ̆r vă pơ ma nuh kơ plăh anih pơ gơ̆r jang hăm dôm anih tĕch mơ dro tơ̆ tĕh đak đe; trong pơ ma nuh găh tơ drong tơ gŭm, pơ jing tơ drong ‘lơ̆ng ăn tơ drong tĕch mơ dro tơ̆ tĕh đak đe; năng ƀôh dôm tơ drong ‘lơ̆ng, tơ drong hơ mĕng ăn tơ mam đơ̆ng Việt Nam tĕch tơ̆ tĕh đak đe, tơ gop pơm hơ tŏk kơ sư̆k pơ jei ăn tơ mam păng đon kơ chăng đơ̆ng anih tĕch mơ dro mưh tĕch mơ dro tơ̆ tĕh đak đe.

Dơ̆ng: Tơ blơ̆