VOV4.Bahnar - Tơ drong rơih hơ met bơ ngai jang ‘nŏh jĭ tơ drong tơm  kơ 2 năr bơ̆ jang mă hơ tuch đơ̆ng rŏng kơ Kuô̆k hô̆i tơ jur năr bơ̆ jang lơ̆m Hop akŏm mă mônh 3 năr. 

Dôm bơ ngai tang măt Kuô̆k hô̆i tăh kơ phĭu hơ met pơ kĕh bơ ngai jang tih lơ̆m hop akŏm mă mônh

Til pơ gê hei (26/7), Anih chĕp kơ̆l pơ gơ̆r Kuô̆k hô̆i roi tơ băt tơ drong pơ ma nuh tơ̆ Khul păng tơ blang, chih akŏm nơ̆r pơ ma đơ̆ng bơ ngai tang măt Kuô̆k hô̆i găh bơ ngai vă pôk pơm Kơ dră tĕh đak. Bơ ngai đei rơih ‘nŏh ƀok  Nguyễn Xuân Phúc – Kơ dră tĕh đak dang ei. Đơ̆ng rŏng kơ pơ ma nuh, Kuô̆k hô̆i pôk rơih Kơ dră tĕh đak kiơ̆ trong tăh kơ phĭu srĕp, roi tơ băt hloi đơ̆ng rŏng kơ ‘nŏh păng Kơ dră tĕh đak ‘nao iung pơ ma nơ̆r iŏk kơ chư̆k.

Đơ̆ng rŏng kơ ‘nŏh hơ nơ̆ng rơih hơ met bơ ngai jang dơ̆ng, Kơ dră tĕh đak roi tơ băt hơ năn vă Kuô̆k hô̆i pôk rơih Thủ tướng tĕh đak; pôk rơih Phŏ Kơ dră tĕh đak, Kơ dră tơm chĕp kơ̆l Anih sek tơ lang, Kơ dră tơm chĕp kơ̆l Anih dăr hơ len kon pơ lei. Tơ drong pơ ma nuh lơ̆m grŭp găh bơ ngai jang dôm kơ chư̆k tih đei Anih chĕp kơ̆l pơ gơ̆r Kuô̆k hô̆i roi tơ băt lơ̆m jơ bơ̆ jang kơ sơ̆ ‘nâu adrol kơ Kuô̆k hô̆i pơ drơ̆ng nơ̆r ăn dôm hơ năn đei rơih.

Dơ̆ng: Tơ blơ̆