VOV4.Bahnar - Tổng thư ký NATO Jens Stoltenberg ‘năr 27/7 ăn tơ băt, Khul âu vă hơ nơ̆ng tơ gŭm ăn Afghanistan đơ̆ng rŏng kơ dôm khul linh lơ tĕh đak kơ dŭn lĕch đơ̆ng tĕh đak ‘nâu. Tơ̆ tuýt-tơ, ƀok Xtôl-ten-bớc ăn tơ băt, ƀok hlôi pơ ma nuh hăm Kơ dră tơm Afghanistan, Ashraf Ghani. 2 păh pơ ma hơ dăh, tơ drong tơ̆ Afghanistan oei đei lơ tơ drong krê mưh Taliban hơ nơ̆ng pơm kơ hret hăm khul kơ dră pơ gơ̆r tơ̆ anih tơm Kabul.

Tổng thư ký Stoltenberg pơ ma hơ dăh, NATO vă hơ nơ̆ng tơ gŭm ăn Afghanistan, đei hloi tơ gŭm tơ mam, ăn bơ ngai jang năm truh păng pơ tho pơ hrăm. Khei ‘năr âu ki, khul linh Taliban hơ tŏk lơ tơ drong tơ blăh păng tơ gar iŏk lơ apŭng tơ̆ tơ ring tơ rang păng lơ anih kơ drâm kơ dôm dêh char đơ̆ng rŏng Kơ dră tơm Mi Joe Biden pơ ma hơ dăh lơ̆m khei 4 akhan, Mi vă kơ dŭn đĭ linh lĕch đơ̆ng tĕh đak ‘nâu lơ̆m khei 9, pơ tôch tơ drong đei măt lơ̆m vă jê̆ 20 sơ năm đơ̆ng khul linh tơ̆ Afghanistan.

Dơ̆ng: Tơ blơ̆