VOV4.Bahnar - Kxo# chih ako\m đơ\ng hla bar tơroi Điện tín -Telegraph kơ teh đak Anh ăn tơbăt, tơdrong teh kơtang hloh 7 độ ríchter đei [ôh ăh năr brei, 12/5 tơ\ teh đak Nepal hlôi pơm 42 ‘nu bngai lôch tơ\ teh đak Nepal, Ấn Độ păng Tây Tạng (Trung Quốc). Kiơ\ kơtơ\ng ang, kxo# bngai lôch tơ\ teh đak Nepal noh 36 ‘nu păng hloh 1.100 ‘nu nai rơka. Tơdro\ teh âu đei [ôh lơ\m khei năr teh đak Nepal oei tơjră hăm tơdrong rơhiu\ng rơhiăng kne# hloh păng tơnap tap đơ\ng ro\ng kơ tơdro\ teh kơtang je# 8 độ  ríchter ăh năr 25/4 âu ki. Pơma lơ\m ‘măng hop ako\m jơnu\m pơgơ\r teh đak ăh kxơ\ năr brei, 12/5, đơ\ng ro\ng kơ Nepal pơtoi chiu pu\ tơdro\ teh kơtang, Thủ tướng teh đak âu noh [ok Sushil Koirala hlôi hơvơn kon pơlei Nepal hơdral păng tơguăt tơguăl vă yak hloh tơnap tap păng rơhiu\ng rơhiăng. {ok Sushil Koirala adoi krao hơvơn kon pơlei tơgu\m ăn dôm tơdrong chă tơgu\m do\ng dôm bngai [ơm xar bar đơ\ng 2 ‘măng tơdro\ teh noh. Jơnu\m pơgơ\r teh đak Nepal hlôi hơvơn rim tơdrong tơgu\m vă pơtruh tơ\ anih tơm Kathmandu păng dôm tơring chiu pu\ răm kơtang hloh đơ\ng ‘măng tơdro\ teh vă tơgu\m kon pơlei.

Lan chih tơblang