VOV4.Bahnar - Pơ gê ‘nâu (8/11- kiơ̆ jơ Nhật Bản), Nhật Bản vă “pơih ‘măng” sơng dơ̆ng bơ ngai năm hŏk păng bơ ngai jang đơ̆ng Việt Nam năm jang dơ̆ng đơ̆ng rŏng lơ khei gơ̆t lê̆ yoa đơ̆ng jĭ Covid-19, hăm nơ̆r athei ƀet đang vaccine păng ăn oei hơ drô̆ kiơ̆ tơ drong hơ găt. Vă gơ̆h mât tơ̆ Nhật Bản, bơ ngai jang athei pơm kiơ̆ trong tang găn jĭ ‘nao đơ̆ng Khul kơ dră tĕh đak ‘nâu.

Mă hơ dăh, hăm bơ ngai ƀet tôm 2 jrŭm vaccine (tŏ sĕt hlŏh ‘nŏh 14 năr) hăm 1 lơ̆m 3 kơ loăi vaccine đei kĭ yoa tơ̆ Nhật Bản ‘nŏh (pfizer, mordena, astrazeneca) păng set hơ len PCR ưh đei pơ rang jĭ 72 jơ adrol kơ mât tơ̆ tĕh đak ‘nâu, ‘nŏh năr ăn oei hơ drô̆ tơ̆ hnam đei tơ jur pă 3 năr đơ̆ng rŏng kơ tĕh đak ‘nâu. Hăm dôm bơ ngai tang mă ƀet tôm dăh mă ƀet tôm hăm dôm kơ loăi vaccine nai, ‘nŏh ‘ngoăih kơ set hơ len PCR ưh đei jĭ lơ̆m 72 jơ adrol kơ mât tơ̆ tĕh đak ‘nâu, athei oei hơ drô̆ tơ̆ hnam 14 năr đơ̆ng rŏng kơ mât tơ̆ Nhật Bản.

Dơ̆ng: Tơ blơ̆