VOV4.Bahnar - Lơ̆m tơ drong pơ ma đam hăm Kơ dră tĕh đak Nguyễn Xuân Phúc kơ sơ̆ ‘năr 11/5, Thủ tướng Nhật Bản Suga Yoshihide tang măt ăn Khul kơ dră tĕh đak păng kon pơ lei Nhật Bản hơ iă kơ ƀok Kơ dră tĕh đak Nguyễn Xuân Phúc đei Kuô̆k hô̆i lui pôk pơm Bơ ngai chĕp kơ̆l tĕh đak Việt Nam; atŭm hăm ‘nŏh pơ ma hơ dăh Nhật Bản tôch năng kăl păng hơ nơ̆ng jang hơ doi kơ jăp, adrin tơ gŭm ăn Việt Nam jang tŏk tĕh đak.

Kiơ̆ thoi noh, Khul kơ dră tĕh đak Nhật Bản tơ chơ̆t tơ gŭm đĕch kơ măy ‘măn răk vaccine đei kơ jă 200 triu Yen, atŭm hăm ‘nŏh pơ truh ƀato tơ chĕng hơ len khoa hŏk tơ̆ đak dơ sĭ păng Nhật Bản vă pơm Anih jang tang măt tơ̆ Đà Nẵng lơ̆m sơ năm truh.

Kơ dră tĕh đak Nguyễn Xuân Phúc pơ ma hơ dăh, lơ̆m trong jang tơ bôl đei tơ lĕch lơ̆m hop akŏm Đảng ‘măng mă 13, Việt Nam ling lang năng Nhật Bản jĭ tĕh đak jang hơ doi gĭt kăl tơm dơ nơm păng đunh đai. Ƀlep ƀât ‘măng mă âu, Kơ dră tĕh đak Nguyễn Xuân Phúc pơ truh nơ̆r krao hơ vơn Ƀok pơ tao păng hơ kăn ƀok Pơ tao Nhật Bản năm hơ pong tơ̆ Việt Nam.

Dơ̆ng: Tơ blơ̆