VOV4.Bahnar - Thủ tướng Tĕh đak ‘nao pơtrŭh nơ̆r tơchơ̆t găh atŏk kơtang rim trong jang vei lăng sơđơ̆ng tang găn jĭ Covid-19. Lơ̆m au, Thủ tướng athei kơdră chĕp pơgơ̆r Dơnŏ anĭh vei lăng kon pơlei rim dêh char, pơlei tơm găh Trung ương, rim Kơdră dơnơm, Kơdră chĕp pơgơ̆r hơnĭh bơ̆ jang găh lơ̆m Dơnŏ anĭh tơm, Dơnŏ anĭh bơ̆ jang găh Khŭl kơdră chĕp pơgơ̆r tĕh đak hơnơ̆ng tơlĕch jang kơtang rim trong pơrô̆ jang đơ̆ng Dơnŏ anĭh tơm Chĭnh trĭ, Ƀan Bí thư, Khŭl kơdră tĕh đak, Thủ tướng Tĕh đak, Dơnŏ anĭh chĕp pơgơ̆r Tĕh đak tang găn jĭ Covid-19 păng rim nơ̆r pơtho tơbăt, tơdrong tơchơ̆t tang găn jĭ hơbŭh đơ̆ng Dơnŏ anĭh tơm vei lăng jang pơgang hăm trong jang kơtang, tơpă păng jơnei vă kĕ tang găn tơdrong jĭ. Jang kiơ̆ kơ hret rim trong jang tang găn, tơchă ƀô̆h, ăn oei hơdrô̆, vat tơring đei jĭ, tơlĕch jang ming hơmet kơtang. Mă kăl lăng kơ jăp jang kiơ̆ rim tơdrong tơchơ̆t ăn oei hơtăih dĭh băl, vat tơring; vĕh ver vat tơring să găh ‘ngoăih, jang ư̆h kơ jăp ‘lơ̆ng găh lăm; kăl tơlĕch jang ‘lơ̆ng ƀơk ăn phe sa ƀa sŏng tơmam sa ăn kon pơlei oei lơ̆m tơring pơvang tang găn, hơnĭh ăn oei hơdrô̆, ăn oei hơtăih dĭh băl. Jang kiơ̆ rim trong jang tang găn kăl hlŏh hăm dôm bơngai ‘nao vĭh đơ̆ng tơring đei jĭ kiơ̆ tơdrong tơchơ̆t.

Tơblơ̆ nơ̆r: Amazưt