VOV4.Bahnar - Kŏng ty kmăi ŭnh hơyŭh Dak Lăk pơgơ̆r pôk ăn 4 pơbŭng hnam ‘mêm mơnat ăn unh hnam tơnap tap tơ̆ tơring Ea Ktur (apŭng Cư Kuin), tơring Cư Kpô (apŭng Krông Ƀŭk) păng tơring Ea Bông (apŭng Krông Ana).

PC Dak Lăk pôk ăn hnam ‘mêm mơnat ăn ŭnh hnam mŏ H’Nuyn Êban

Mĭnh pơbŭng hnam đei Kŏng ty tơgŭm ăn 60 trĭu hlak jên, unh hnam hăm rim hơnĭh jang tơring vang tơra tơgop jơhngơ̆m jang păng kon jên hu vă ming man hnam să ‘lơ̆ng ƀiơ̆. Mơ̆t oei lơ̆m hnam ‘nao, mŏ H’Nuyn Êban, oei tơ̆ buôn Jung A, tơring Ea Ktur, apŭng Cư Kuin, pơma:“Ba chhôk dêh đơ̆ng dang ei hlôi đei oei lơ̆m hnam ‘nao bơih. Sơ̆ ki ŭnh hnam nhôn oei lơ̆m hnam hiăh hiok, dang ei ba pă đei tơtăm mư̆h tŏ ‘mi kial trŭh bơih. Bơnê kơ khŭl kơdră hlôi tơgŭm ming man ăn kơ ŭnh hnam nhôn hnam oeu au”.

Atŭm hăm pơm ăn hnam, PC Dak Lăk oei pôk ăn 1 ŭnh hnam 1 tŏ tivi 40inch păngmĭnh ƀar tơmam drăm ŭnh hơyŭh.

Ƀok Trần Văn Thuận, Kơdră chĕp pơgơ̆r Kŏng ty kmăi ŭnh hơyŭh Dak Lăk tơbăt, atŏk kơtang bơ̆ jang tơgŭm tơpôl ƀlep lơ̆m năr tơbăt 45 sơnăm pơjing hơnĭh au, lơ̆m sơnăm au, atŭm hăm pôk tơmam drăm ăn rim hơnĭh jang tang găn jĭ hơbŭh Covid-19..., kŏng ty oei tơgŭm hlŏh 400 trĭu hlak jên vă ming man 6 tŏ hnam ‘mêm mơnat ăn rim ŭnh hnam tơnap tap.

Tơblơ̆ nơ̆r: Amazưt