VOV4.Bahnar - Kơ sơ̆ 28/12, tơ̆ plt Buôn Ma Thuột, Công ty jang unh điên Dak Lak pơm lêh tơ băt 45 sơ năm pơ jing (28/12/1976 - 28/12/2021) păng sơng iŏk Ƀăng khen đơ̆ng Thủ tướng tĕh đak.

Hơ păh Ƀăng khen đơ̆ng Thủ tướng tĕh đak

Yak hlŏh 45 sơ năm pơ jing păng jang tŏk, truh dang ei PC Dak Lak oei vei lăng hlŏh 450 km trong tơ lei 110 kV; hlŏh 4000 km trong tơ lei trung áp; 6.200 anih ƀiên ap; pơ truh unh điên ăn hlŏh 574.000 ‘nu tơ moi tơ̆ Dak Lak, iŏk đei vă jê̆ 100% kơ sô̆ kon pơ lei đei yoa unh điên. Sơ năm ‘nâu, mă đơ̆ng jĭ Covid – 19 đei tôch hơ mơt, công ty oei đei iŏk yoa hlŏh 3.260 ti hlak jên; nôp jên ăn tĕh đak 50 ti.

Hơ dai hăm tơ drong pơm tơ lĕch păng tĕch mơ dro, PC Dak Lak oei đei lơ tơ drong jang tơ gŭm vei sơ đơ̆ng tơ drong arih xa tơ pôl, hue lăng truh tơ̆ pơ lei pơ la. Lăp lơ̆m 5 sơ năm tơ jê̆ âu, Công ty ‘măn hlŏh 3,6 ti hlak jên ăn tơ drong jang tơ gŭm tơ pôl tơ̆ tơ ring. Hơ drô̆ lơ̆m sơ năm 2021, akŏm đĭ đăng jên bơ̆ jang tơ drong ‘nâu đei hlŏh 880 triu hlak jên. Ƀlep ƀât tơ băt 45 sơ năm năr pơ jing, PC Dak Lak chơt hơ iă đei Thủ tướng tĕh đak hơ păh ăn Ƀăng khen.

Dơ̆ng: Tơ blơ̆