VOV4.Bahnar - Dêh char Dak Lak hlôi tơ mơ̆t lơ̆m bơ̆ jang Hnam pơ gang pơm tơ̆ ‘ngoăih kơ sô̆ 1 pơ yua ăn hơ met ăn dôm bơ ngai jĭ Covid-19 đei ƀôh jĭ păh lăp. Hnam pơ gang pơm tơ̆ ‘ngoăih  hlôi iŏk yua bơ̆n tơ mam 3 hnam tơ̆ng Ký túc xá Hnam trưng Cao đẳng Sư phạm Dak Lak, akŏp đĭ đăng 180 lăm hăm 1.000 tŏ giơng.

Hnam pơ gang pơm tơ̆ ‘ngoăih kơ sô̆ 1 đei iŏk pơm đơ̆ng 3 hơ nih ký túc xá Hnam trưng Cao đẳng Sư phạm Dak Lak

Ƀak si Nguyễn Ngọc Thịnh, Kơ dră vei lăng Hnam pơ gang pơm tơ̆ ‘ngoăih kơ sô̆ 1 tơ băt, vă hnam pơ gang jăh bơ̆ jang đei tơ drong tơ gŭm tih đơ̆ng anih jang ŭnh điên Dak Lak:

“Sơng iŏk hơ nih ký túc xá nhôn hơ len lăng dơ̆ng ‘noh ŭnh điên, đak tơ̆ âu hư tôch kơ lơ. Nhôn hlôi gơ nang tơ drong tơ gŭm đơ̆ng kŏng ti ŭnh điên Dak Lak ăn ‘nhŏng oh kŏng nhân năm tơ gŭm; păng kŭm tơ plih hơ nih biến áp vă hơ tŏk kơ sư̆k yua ŭnh điên ăn hnam pơ gang pơm tơ̆ ‘ngoăih âu. Mă 2 ‘noh jĭ kŏng ti kŭm song nhôn mơng 1 pôm kơ măy pơ̆ih ŭnh điên răk hiă vă lê̆ hiă mư̆h kŭp ŭnh điên ư̆h kơ ê veh ver ƀơm ư̆h kơ ‘lơ̆ng truh tơ drong khăm hơ met jĭ.”

Thuem: Tơ blơ̆