VOV4.Bahnar -Năr pơh, ‘năr 23/5 truh, bơ ngai tăh hla kơ dêh char Dak Nông gô pơm kiơ̆ tơ drong pôk rơ̆ih tơ̆ 680 hơ nih tăh kơ phiê̆u. Pơ yua ăn tơ drong jang gĭt kăl âu, Kŏng ki jang ŭnh điên Dak Nông hlôi tơ lĕch lơ trong jang vei sơ đơ̆ng pơ truh ŭnh điên hơ nơ̆ng, sơ đơ̆ng hơ drol, lơ̆m păng đơ̆ng rŏng năr pôk rơ̆ih.

Kơ  măy pơ truh ŭnh điên hơ met hiă đơ̆ng PC Dak Nông

Jĭ dêh char sơ lam đei hơ găt tĕh xă, tơ ley ŭnh điên vă đĭ đăng pơm tơ̆ rim tơ ring groi kông krê hơ mơt, mă lei, rim anih jang ŭnh điên tơ̆ Dak Nông hlôi pơ gơ̆r bơ̆ jang hơ len lăng hơ nơ̆ng măng năr, mă loi ‘noh jĭ tơ̆ rim trong tơ ley ư̆h kơ gan jăng. Hơ dai hăm ‘noh, rim grŭp, khŭl hlôi hơ met ăn tôm tơ mam răk hiă păng rim tơ mam kơ măy kơ mŏk, tơ mam vei sơ đơ̆ng, vă hơ met hrĕnh mư̆h đei ư̆h kơ ‘lơ̆ng găh ŭnh điên.

Hơ len lăng tơ mam pơ truh ŭnh điên ăn hơ nih pôk rơ̆ih tơ̆ xăh sơ lam Quảng Trực, Tuy Đức

Rim anih jang kŭm hơ met ăn bơ ngai jang, kơ măy pơ̆ih răk hiă tơ̆ rim hơ nih tăh kơ phiê̆u. Hăm tơ drong hơ met ăn tôch hơ len, ŭnh điên Dak Nông lui gô vei sơ đơ̆ng pơ truh ŭnh điên ‘lơ̆ng, tơ gop lơ̆m jơ nei đơ̆ng năr chơt hơ iă pôk rơ̆ih kơ teh đak.

Thuem: Tơ blơ̆