VOV4.Bahnar - Yak hơdoi hăm Khŭl bơ̆ jang tang găn jĭ hơbŭh Covid-19, Kŏng ty Ŭnh hơyŭh Dak Nông ‘nao pôk ăn 500 blăh hơbĕn ao jang pơgang hăm kơ jă kơ jên hlŏh 65 trĭu hlak jên ăn Hơnĭh tơm dăr lăng hơlen jĭ jăn dêh char păng rim Hnam pơgang Gia Nghĩa, Dak Song, Dak Mil.

Hơdrol kơ ‘nŏh, lơ̆m khei 6, Kŏng ti jei năm ngôi păng pôk ăn Hnam pơgang pơlei tơm Gia Nghĩa, hnam pơgang phương Nghĩa Tân 4 tŏ kăi pơtŏ yŭh akau jăn, rim tơmam drăm pơlôch sơmach jĭ păng lơ che gom ƀŏ. Atŭm hăm bơ̆ jang pôk ăn tơmam drăm jang pơgang, Hnam kmăi ŭnh hơyŭh Dak Nông jei tŏk bŏk tơlĕch rim trong jang hrơ̆p mĭnh ‘măng sơ đơ̆ng pơtrŭh ŭnh hơyŭh ăn 155 hnam pơgang, rim hơnĭh ăn oei hơdrô̆ akŏm lơ̆m dêh char. Đei băt đơ̆ng mă jĭ hơbŭh Covid-19 pơrăm trŭh dang ei, PC Dak Nông hơnơ̆ng hơdrin, vei kơ jăp lơ tơdrong jang lăng trŭh pơlei pơla, vang iung jang tang găn jĭ, tơgop tơgŭm djru lơ̆m Hơnĭh mong răk vaccine hăm akŏp kon jên vă jê̆ 300 trĭu hlak jên.

Tơblơ̆ nơ̆r: Amazưt