VOV4.Bahnar - Kơ sơ̆ brei (6/5), ƀok Đỗ Văn Chiến, Bí thư Trung ương Đảng, Kơ dră Anih jang Trung ương Mặt trận tổ quốc Việt Nam, Phŏ kơ dră Jơ nŭm vei lăng pôk rơ̆ih teh đak hlôi bơ̆ jang hăm dêh char Bà Rịa-Vũng Tàu găh tơ drong jang hơ met ăn pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026. Lơ̆m dêh char Bà Rịa Vũng Tàu hlôi pơ jing 814 grŭp pôk rơ̆ih tơ̆ 814 hơ nih tăh kơ phiê̆u. Đơ̆ng rŏng hop akŏm pơ ma dơ nuh ‘măng mă pêng, hơ năn bơ ngai lĕch pơ jei pơm bơ ngai tang măt Kuôk hô̆i jăl 15 ‘noh 10 ‘nu; 85 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char; 430 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei rim apŭng; 3.468 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei rim răh. Ƀok Đỗ Văn Chiến lăng ‘lơ̆ng tơ drong jang hơ met ăn pôk rơ̆ih đơ̆ng dêh char Bà Rịa -Vũng Tàu; hơ dai hăm ‘noh tơ tă kơ dêh char athei lăng kăl tơ drong jang vei lăng sơ đơ̆ng, ư̆h kơ lê̆ đei ƀôh tơ drong ư̆h kơ ê hơ drol, lơ̆m păng đơ̆ng rŏng kơ pôk rơ̆ih.

Thuem: Tơ blơ̆