VOV4.Bahnar - Kơ sơ̆ 4/5, Đại tướng Đỗ Bá Tỵ, Phŏ Kơ dră Kuô̆k hô̆i, Kơ dră jang lơ̆m Anih vei lăng pôk rơih tĕh đak, Kơ dră Anih vei sơ đơ̆ng păng jang pơ gang đei jơ hơ len năng păng bơ̆ jang hăm Anih vei lăng pôk rơih dêh char Bình Định.

Truh dang ei, Anih vei lăng pôk rơih dêh char Bình Định pơ jing 3 anih pôk rơih bơ ngai tang măt Kuô̆k hô̆i, 19 anih pôk rơih Jơ nŭm pơ gơ̆r kon pơ lei dêh char, 110 anih pôk rơih Jơ nŭm pơ gơ̆r kon pơ lei tơ̆ apŭng, thĭ xăh, plt păng vă jê̆ 1.200 anih pôk rơih Jơ nŭm pơ gơ̆r kon pơ lei tơ̆ xăh, phương. Dang ei, Bình Định tam mă đei bơ ngai tơ pŏh jĭ, mă lei anih jang pơ gang hlôi hơ met ‘lơ̆ng trong jang tang găn jĭ Covid-19; kơ chăng tơ lĕch lơ trong vei lăng sơ đơ̆ng.

Pơ ma lơ̆m jơ bơ̆ jang, Phŏ Kơ dră Kuô̆k hô̆i Đỗ Bá Tỵ akhan, đơ̆ng dang ei truh năr pôk rơih, Anih vei lăng pôk rơih dêh char Bình Định athei hơ tŏk tơ drong roi tơ băt kiơ̆ lơ trong mă ‘lơ̆ng. Anih jang pơ gang đei trong tang găn mưh tơ drong jĭ Covid-19 tơ pŏh tơ̆ tơ ring, pơm ‘lơ̆ng ăn tơ drong pôk rơih đei pơ gơ̆r kĕh đang, sơ đơ̆ng ‘lơ̆ng, đei yoa păng huei huach lơ kon jên.

Dơ̆ng: Tơ blơ̆