VOV4.Bahnar - Pơ gê 22/06, Jơ nŭm pơ gơ̆r kon pơ lei dêh char Hậu Giang jăl X, đơ̆ng 2021-2026 pơ gơ̆r hop akŏm ‘măng mă 1. Kơ dră jang lơ̆m Anih tơm Chinh trĭ, Phŏ Kơ dră chĕp kơ̆l Kuô̆k hô̆i Trần Thanh Mẫn vang truh păng iung pơ ma nơ̆r pơ tho lơ̆m hop akŏm.

Pơ ma lơ̆m hop akŏm, Phŏ Kơ dră chĕp kơ̆l Kuô̆k hô̆i Trần Thanh Mẫn athei, iŏk đơ̆ng blŭng jăl jang 2021-2026, Khul kơ dră chĕp kơ̆l Jơ nŭm pơ gơ̆r kon pơ lei dêh char athei jang hơ doi mă kơ jăp hăm Khul kơ dră chĕp kơ̆l Dơ nŏ anih vei lăng kon pơ lei, Anih MTTQVN dêh char păng Khul tang măt Kuô̆k hô̆i dêh char drơ̆ng nơ̆r chih pơ jing păng tơ lĕch tơ drong hơ găt jang hơ doi, pơ jao hơ dăh tơ drong jang;

Khul kơ dră chĕp kơ̆l Dơ nŏ anih vei lăng kon pơ lei, dôm bơ ngai jang lơ̆m Anih âu păng dôm Kơ dră pơ gơ̆r sek tơ lang kơ dêh char ‘nao đei pôk rơih athei akŏm đon rơ gei, tơ guăt 1 ƀơ̆r đon, chih hơ dăh dôm tơ drong kăl đei ƀơm truh, tơ gĕch iŏk tơ drong ‘lơ̆ng, pran vă chĕp kơ̆l pơ gơ̆r bơ̆ jang, khŏm pơ jing dêh char Hậu Giang jing anih tơm jang mŭk drăm tơ̆ tơ ring tĕh tơ măn đak krong Cửu Long.

Dơ̆ng: Tơ blơ̆