VOV4.Bahnar - Pơ gê (13/5), Khul dăr lăng đơ̆ng Anih chĕp kơ̆l pơ gơ̆r Kuô̆k hô̆i, Anih vei lăng pôk rơih tĕh đak yoa Phŏ Kơ dră tĕh đak, Phŏ Kơ dră Anih vei lăng pôk rơih tĕh đak Võ Thị Ánh Xuân chĕp kơ̆l bơ̆ jang hăm dêh char Dak Nông găh tơ drong pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026.

Anih chĕp kơ̆l pơ gơ̆r Kuô̆k hô̆i, Anih vei lăng pôk rơih tĕh đak bơ̆ jang hăm dêh char Dak Nông

Nơ̆r tơ roi đơ̆ng Anih vei lăng pôk rơih dêh char Dak Nông ăn tơ băt, pôk rơih bơ ngai tang măt Kuô̆k hô̆i tơ̆ dêh char, đei 2 anih păng kơ sô̆ bơ ngai tang măt vă pôk rơih ‘nŏh 6 ‘nu. Pôk rơih Jơ nŭm pơ gơ̆r kon pơ lei dêh char đei 14 anih păng kơ sô̆ bơ ngai tang măt vă pôk rơih ‘nŏh 52 ‘nu, tơ̆ apŭng đei 78 anih, bơ ngai tang măt vă pôk rơih ‘nŏh 272 ‘nu, tơ̆ xăh đei 569 anih, vă pôk rơih 1.779 ‘nu bơ ngai tang măt.

Lơ̆m jơ bơ̆ jang, Phŏ Kơ dră tĕh đak, Phŏ Kơ dră Anih vei lăng pôk rơih tĕh đak Võ Thị Ánh Xuân tơ tă, vă năr pôk rơih gơ̆h pơ gơ̆r sơ đơ̆ng ‘lơ̆ng lơ̆m khei ‘năr oei đei jĭ Covid-19 tôch hơ mơt, dêh char Dak Nông athei hơ tŏk tơ drong vei lăng sơ đơ̆ng tơ pôl păng bơ̆ jang ‘lơ̆ng trong tang găn jĭ vă kon pơ lei sơ đơ̆ng jơ hngâm năm pôk rơih.

Dơ̆ng: Tơ blơ̆