VOV4.Bahnar - Pơ gê ‘năr 26/11, tơ̆ Anih jang kơ ƀok Kơ dră teh đak, Phŏ Kơ dră teh đak Võ Thị Ánh Xuân hop akŏm Jơ nŭm vei lăng tơ gŭm Anih mong jên tơ gŭm hơ ioh Việt Nam. Đơ̆ng blŭng sơ năm truh dang ei, Anih mong jên tơ gŭm hơ ioh Việt Nam hlôi tơ gŭm hloh 98 rơ bâu ‘nu hơ ioh hăm akŏp đĭ đăng jên hloh 61 ti hlak jên. Lơ̆m noh hlôi pơ gơ̆r khăm hơ len dôm tơ drong jĭ plei nuih đơ̆ng oei nge, jĭ ưh kơ gơh nơ năm, kơ dâu, jĭ tơ̆ măt ăn kơ 1 rơ bâu 200 ‘nu hơ ioh bơ ngai kon kông, hơ ioh găh ŭnh hnam dơ nuh hin, vă jê̆ dơ nuh hin tơ ring groi kông. Jên tơ gŭm vă jê̆ 6,9 ti hlak jên, hăm hloh 20 rơ bâu ‘nu hơ ioh đei sa yua. Mă loi ‘noh, yua đơ̆ng ƀơm ưh kơ ‘lơ̆ng đơ̆ng jĭ Covid-19, Anih mong jên hlôi tơ gŭm hloh 18 ti hlak jên ăn hloh 14 rơ bâu ‘nu hơ ioh. Bơ ngai iŏk tơ gŭm ‘noh hơ ioh đei tơ drong arih sa mơ mat tat dêh hloh dăh mă hơ ioh găh ŭnh hnam dơ nuh hin, ŭnh hnam vă jê̆ dơ nuh hin, hơ ioh kon kŏng nhân, kon pơ lei jang chŭn mir ưh kơ đei tơ drong jang păng nge ‘nao rơ neh đei mĕ jĭ COVID-19. Phŏ Kơ dră teh đak Võ Thị Ánh Xuân tơ̆ ‘măng hop akŏm hlôi krao hơ vơn rim bơ ngai jang lơ̆m Jơ nŭm vei lăng tơ gŭm hơ tŏk hloh dơ̆ng hơ năp jang đơ̆ng kơ dih vă hơ vơn kon jên ‘lơ̆ng hloh tơ gŭm hơ ioh đei tơ drong arih sa mơ mat tat dêh hloh.

Thuem: Tơ blơ̆