VOV4.Bahnar - Pơ gê ‘năr 18/11, tơ̆ Hà Nội, Anih tơm vei lăng găh bơ ngai jang lĭnh jĭ rơ ka păng tơ pôl pơ gơ̆r lêh tơ băt Năr thây kô pơ tho Việt Nam (20/11) păng sơng iŏk mê đai Bơ̆ jang mă mônh kơ Anih jang vei lăng găh pơ tho pơ hrăm tơ drong jang. Sơ năm hŏk âu ki jĭ hơ buh COVID-19 hlôi pơm ăn tơ sŭl tơ săl, ƀơm ưh kơ ‘lơ̆ng truh tơ drong jang pơ tho pơ hrăm tơ drong jang păng bơ̆ jang, lơ dêh char pơ lei tơm ưh kơ ăn yak vih vơ̆t lơ̆m tơ pôl hlôi đei ƀơm ưh kơ ‘lơ̆ng tih kơ truh tơ drong jang pơ tho păng hŏk đơ̆ng hloh 1 rơ bâu 900 anih pơ tho pơ hrăm tơ drong jang lơ̆m teh đak.

Phŏ kơ dră teh đak Võ Thị Ánh Xuân hlôi pơ jao Mê đai Bơ̆ jang mă mônh ăn Anih jang vei lăng gah pơ tho pơ hrăm tơ drong jang

 Mă lei, khŭl jang pơ tho pơ hrăm tơ drong jang lơ̆m teh đak hlôi kơ chăng, tơ tĕnh pơm lăp, tơ plih đơ̆ng tơ drong pơ tho kơ tă jing pơ tho trực tuyến. Rim thây kô pơ tho hlôi hơ met ‘lơ̆ng mơ mat tat, kơ chăng tơ lĕch jang hrơ̆ch 1 ‘măng, hơ drin jang rim trong jang tang găn jĭ hơ buh đei yua. Tơ̆ jơ pơm lêh, tang măt kơ dră chĕp kơ̆l Đảng, teh đak, Phŏ Kơ dră teh đak Võ Thị Ánh Xuân hlôi pơ jao Mê đai Bơ̆ jang mă mônh ăn Anih jang vei lăng găh pơ tho pơ hrăm tơ drong jang, Anih tơm vei lăng găh bơ ngai jang linh jĭ rơ ka păng tơ pôl.

Thuem: Tơ blơ̆