VOV4.Bahnar - Năm truh ‘măng tơ băt năr Thây kô Việt Nam, kơ sơ̆ 18/11, tơ̆ Anih jang kơ ƀok Kơ dră tĕh đak, Phŏ Kơ dră tĕh đak Võ Thị Ánh Xuân tơ ƀâp Khul tang măt ăn thây kô rơ gei ƀlep ƀât vang truh akŏm lơ̆m tơ dỏng “Vang tơ gŭm hăm thây kô” sơ năm 2021.

Pơ ma tơ̆ jơ tơ ƀâp, Phŏ Kơ dră tĕh đak Võ Thị Ánh Xuân pơ truh nơ̆r hơ iă hăm đĭ đăng thây kô, kăn ƀô̆ vei lăng pơ tho pơ hrăm lơ̆m tĕh đak pơ ma atŭm păng đe thây kô vang akŏm tơ̆ âu, dôm nơ̆r ‘lơ̆ng hơ iă hlŏh ƀlep ƀât tơ băt năr Thây kô Việt Nam 20/11.

Phŏ Kơ dră tĕh đak tơ ƀôh tơ drong mơ nat hăm dôm tơ drong mơ mat tat, tơ drong kơ nê̆ đơ̆ng jĭ Covid-19 hăm thây kô păng anih pơ tho pơ hrăm. Mă lei, hăm trong jang "Pơ dơ̆h ‘mơ̆i tơ drong năm tơ̆ hnam trưng, mă lei ưh đei pơ dơ̆h hŏk", anih pơ tho pơ hrăm hlôi đei lơ tơ drong tơ plih ming trong pơ tho, hŏk pơ hrăm, pơ gơ̆r ‘lơ̆ng dôm tơ drong thi, pơm lêh mât hŏk sơ năm hŏk ‘nao lăp hăm trong tang găn jĭ.

Dơ̆ng: Tơ blơ̆