VOV4.Bahnar - Pơ gê ‘năr 28/12, tơ̆ Hà Nội, Khŭl vei lăng bơ ngai răm đơ̆ng pơ gang dioxin Việt Nam pơ gơ̆r lêh tơ băt 60 sơ năm hiong răm đơ̆ng pơ gang dioxin tơ̆ Việt Nam (10/8/1961-10/8/2021); sơng iŏk Mê đai bơ̆ jang dơ̆ng mă Pêng păng Hop akŏm bơ ngai hơ gei yua kơ bơ ngai răm đơ̆ng pơ gang dioxin ‘măng mă 4, jăl jang 2016-2021. Phŏ Kơ dră teh đak Võ Thị Ánh Xuân vang akŏm păng pơ jao Mê đai ăn Khŭl jang. Pơ ma tơ̆ lêh tơ băt, Phŏ kơ dră teh đak Võ Thị Ánh Xuân athei Khŭl vei lăng bơ ngai răm đơ̆ng pơ gang dioxin rim tơ ring kăl hơ nơ̆ng tơ plih ‘nao tơ drong, trong bơ̆ jang, hơ tŏk jơ hngơ̆m đon “ Tơ goăt tơ goăl - ‘mêm mơ nat - Jang tơ năp - Yua kơ bơ ngai răm đơ̆ng pơ gang dioxin”, hơ tŏk ‘lơ̆ng đei yua tơ drong jang, jang ‘lơ̆ng hloh dơ̆ng tơ drong jang tơ gŭm apĭnh păng hơ vơn rim kon jên lơ̆m tơ pôl vă vei lăng, tơ gŭm păng iung jang athei tơ gŭm ăn bơ ngai răm đơ̆ng pơ gang dioxin hăm dôm trong jang păng hơ yak năm lăp hăm tơ drong hơ tŏk tơ iung kơ teh đak.

Thuem: Tơ bơ̆