VOV4.Bahnar - Kơ sơ̆ ‘năr 6/1, tơ̆ Hà Nội, Jơ nŭm rim anih jang tơ bôl Việt Nam, Khŭl jang tơ bôl Việt Nam - Ấn Độ jang hơ dai hăm Anih jang tang măt Ấn Độ tơ̆ Việt Nam pơ gơ̆r pơm lêh tơ băt 50 sơ năm năr pơ jing tơ drong pơ vei jang tơ bôl Việt Nam - Ấn Độ. Truh akŏm đei Phŏ Kơ dră teh đak Võ Thị Ánh Xuân. Kơ dră Anih tơm vei lăng găh tơ drong kơ tơ̆ng ang păng tơ roi tơ băt Nguyễn Mạnh Hùng, Kơ dră Khŭl jang tơ bôl Việt Nam - Ấn Độ pơ ma hơ dăh Khŭl jang tơ bôl Việt Nam - Ấn Độ păng jơ nŭm rim anih jang tơ bôl Việt Nam jang hơ dai kơ jăp hăm rim khŭl jang hơ dai Ấn Độ păng rim anih jang ƀơm truh kơ 2 teh đak, hơ tŏk loi dơ̆ng rim tơ drong jang tơ ƀơ̆p pơ ma dơ nuh đơ̆ng kon pơ lei, vei lăng păng pơm hơ tŏk tơ drong jang tơ bôl. Đơ̆ng noh tơ gop pơ trŭt tơ drong pơ vei jang hơ dai tơ drong jang tôm tong  Việt Nam - Ấn Độ hơ tŏk tơ iung tŏk ‘lơ̆ng ‘nao, pơm lăp đei yua đơ̆ng kon pơ lei 2 teh đak. Pơ ma tơ̆ jơ pơm lêh Phŏ Kơ dră teh đak Võ Thị Ánh Xuân athei, rim anih jang, khŭl grŭp, anih jang mơ dro sa păng kon pơ lei 2 teh đak kăl kơ jang hơ dai kơ jăp hloh dơ̆ng, hơ tŏk anih dơ̆ng, hơ năp jang păng tơ mam ‘lơ̆ng kơ 2 teh đak, tơ gĕch iŏk yua ‘lơ̆ng rim tơ drong hiôk jang hơ dai. Jang kiơ̆ ‘lơ̆ng Tơ drong bơ̆ jang 2021-2023 tơ lĕch jang tơ drong pơ vei jang hơ dai tôm tong păng trĕng lăng atŭm găh Tơ drong rơ ngei, hơ nŭk hơ noa păng kon pơ lei hlôi đei pơ drơ̆ng kiơ̆ khei 12/2020.

Thuem: Tơ blơ̆