VOV4.Bahnar – Pơgê năr (7/5), Khul kơpal kơ Jơnŭm pơgơ̆r pôk rơih kơ teh đak yuơ Phŏ Kơdră Kuôk hô̆i Đỗ Bá Tỵ, jang lơ̆m Jơnŭm pơgơ̆r pôk rơih kơ teh đak, Kơdră Jơnŭm vei xơđơ̆ng tơpôl păng Y tê̆ chĕp kơ̆l Khul kơpal hlôi bơ̆ jang hăm Jơnŭm pơgơ̆r pôk rơih dêh char Khánh Hòa chă hơlen tơdrong jang hơmet ăn 'măng pôk rơih bơngai jang tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl đơ̆ng xơnăm 2021- 2026. Kiơ̆ Jơnŭm pơgơ̆r pôk rơih dêh char Khánh Hòa, jâ̆p dêh char đei hloh 970 rơbâu 'nu bơngai tăh hla, hăm hloh 960 anih tăh kơphĭu. Dêh char hlôi pơjing 3 anih pôk rơih bơngai jang tang măt ăn Kuôk hô̆i jăl 15,  14 anih pôk rơih bơngai jang tang măt lơ̆m Hô̆i đŏng kon pơlei dêh char. Phŏ Kơdră Kuôk hô̆i Đỗ Bá Tỵ pơkăp vă tơdrong pôk rơih Kuôk hô̆i păng Hô̆i đŏng kon pơlei dôm jăl gơh rơngei hiôk hian, hơtŏ hơnơ̆ng, trŏ khôi luơ̆t, xơđơ̆ng mong ƀiơ̆, Jơnŭm pơgơ̆r pôk rơih dêh char hơnơ̆ng hơlen tơdrong jang pôk rơih tơ̆ tơring, chă hơlen hơdăh kơsô̆ bơngai năm tăh hla, mă hăt noh kơsô̆ bơngai tah hla tŏk bŏk oei nơnăm kiơ̆ đak dơxĭ. Hăm tơdrong hơbuh hli đơ̆ng pơrang jĭ Covid-19, Phŏ Kơdră Kuôk hô̆i Đỗ Bá Tỵ pơkăl dêh char Khánh Hòa tơlĕch jang kơjăp dôm trong tang găn păng tơjră pơrang jĭ.

Lan chih păng pơre nơ̆r