VOV4.Bahnar  – Phŏ Kơdră teh đak bơ̆n Võ Thị Ánh Xuân atŭm hăm Khul kơpal 'năo truh apong, axong tơmam ăn anih jang hơlen tang găn păng tơjră pơrang jĭ Covid-19 tơter đak dơxĭ păng anih jang tang găn păng tơjră pơrang jĭ tơ̆ trong xơlam teh lơ̆m Anih linh Vei hơlen 'măng xơlam apŭng plenh teh Hà Tiên păng bơ̆ jang hăm khul kơpal dêh char Kiên Giang găh tơdrong jang tang găn păng tơjră pơrang jĭ Covid-19.

Tơ̆ dôm anih truh apong, Phŏ Kơdră teh đak bơ̆n Võ Thị Ánh Xuân apinh jet găh jơhngơ̆m jăn, tơdrong oei xa păng pơm jang đơ̆ng đe kang ƀô̆ linh vang jang tơ̆ anih jang tang găn păng tơjră pơrang jĭ tơ̆ tơring xơlam teh. Phŏ Kơdră teh đak pôk bơnê kơ dôm tơdrong adrin găn hloh rim tơdrong tơnap tap đơ̆ng khul jang tang găn păng tơjră pơrang jĭ Covid -19 tơ̆ Hà Tiên; hơpơi 'moih rim khul jang pơtoi găn hloh tơnap tap, adrin keh đang xơnong jang đei pơjao. Phŏ Kơdră teh đak tơrĕk hăm Kiên Giang kăl kơchăng hloh dơ̆ng lơ̆m tơdrong axong tơmam drăm, tơdrong hiôk păng axong khul jang vă pơm jang đei jơnei xơnong tang găn păng tơjră pơrang jĭ lơ̆m tơdrong đei ƀôh 'nao dang ei.

Lan chih păng pơre nơ̆r