VOV4.Bahnar -  Pơgê năr 29/12, tơ̆ Hà Nội, Jơnŭm vei lăng pơxat Ƀok Kơdră Hồ Chí Minh pơm lêh xơng Mê đai Pơm jang tăl mă 2; xơkơ̆t xơnong jang kơ xơnăm âu păng tơlĕch xơnong jang ăn xơnăm kơnh. Phŏ Kơdră teh đak bơ̆n Võ Thị Ánh Xuân năm akŏm lêh. Khei năr âu ki, Jơnŭm pơgơ̆r pơxat Ƀok Kơdră Hồ Chí Minh hlôi keh đang tơnăp xơnong jang đei pơjao, hơkâu Ƀok Kơdră Hồ Chí Minh đơ̆ng rŏng 50 xơnăm đei vei lăng tơnăp, tam mă ƀôh đei tơdrong tơplih yơ pơtêng hăm dôm tơdrong chih akŏm lơ̆m hla bar hơlen hơkâu kơ dôm Jơnŭm jang adrol ki. Đơ̆ng năr pơih 'măng Pơxat truh dang ei, anih jang hlôi xơng, jong tơnăp, xơđơ̆ng 324 'măng pơjôk đơ̆ng Khul Kơpal teh đak, 427 Khul Kơpal kơ dôm tơring păng jê̆ 60 trĭu 'nu tơmoi, lơ̆m noh đei hloh 10 trĭu 'nu tơmoi đơ̆ng teh đak đe truh pơjôk pơxat Ƀok Kơdră Hồ Chí Minh. Tang măt ăn Khul kơpal Đảng, Teh đak, Phŏ Kơdră teh đak bơ̆n Võ Thị Ánh Xuân hlôi pơjao Mê đai Pơm jang tăl 2 ăn Jơnŭm Vei lăng Pơxat Ƀok Kơdră Hồ Chí Minh.

Lan chih păng pơre nơ\r