VOV4.Bahnar - Pơ gê ‘năr 16/03, Phŏ Thủ tướng, Kơ dră tơm jang tơ bôl Phạm Bình Minh hlôi pơ ma điên thoăi hăm Kơ dră tơm jang tơ bôl tĕh đak Cộng hòa Cu-ba Bruno Rodriguez Parrilla vă pơ ma dơ nŭh găh trong vă jang, trong jang hơ nơ̆ng hơ tŏk loi dơ̆ng tơ drong pơ vei tơ bôl, jang hơ dai gĭt kăl đơ̆ng 2 tĕh đak. Tơ̆ jơ pơ ma điên thoăi, Phŏ Thủ tướng, Kơ dră tơm jang tơ bôl Phạm Bình Minh pơ ma hơ dăh trong jang kơ jăp đơ̆ng Việt Nam ling lang dơ̆ng hơ dai tơ goăt tơ goăl păng tơ gŭm Cu-ba. Kơ dră tơm Bruno tơ ƀô̆h jơ hngơ̆m đon Cu-ba lăng kăl păng ‘mĕh vă pơm ‘lơ̆ng gĭt kăl hlŏh dơ̆ng tơ drong pơ vei joăt joe păng jang hơ dai tôm tơ drong hăm Việt Nam, lăng ‘lơ̆ng dôm tơ drong hơ drin đơ̆ng Việt Nam tơ jră hăm jĭ Covid-19, hơ dai hăm ‘nŏh pơ vei tơ drong mŭk drăm tŏk. 2 kơ dră tơm jang tơ bôl pơ ma hơ dăh khŏm tơ lĕch jang dôm nơ̆r pơ kăp gĭt kăl vă vei kơ jăp tơ drong pơ vei tơ goăt tơ goăl, jang tơ bôl gĭt kăl păng jang hơ dai tôm tơ drong Việt Nam- Cu-ba, tơ lĕch jang đei yua tơ drong jang kăl 2 pang sơ năm 2021.

Thuem: Tơ blơ̆